„Maður gæti nánast haldið að forsetinn Halla Tómasdóttir og sendinefnd hennar hefðu komið með heimskautavindana með sér til Stokkhólms,“ segir í umfjöllun sænska blaðsins Aftonbladet um opinbera heimsókn forseta Íslands í Svíþjóð, sem hófst í Konungshöllinni í Stokkhólmi í dag.
Athygli vakti í hallargarðinum að vindurinn hafði feykt íslenskum fánum á jörðina í gangvegi Höllu og Karls Gústafs Svíakonungs. Konungurinn gerði sér lítið fyrir undir heiðurverði lífvarðasveitarinnar og beygði sig eftir íslenska fánanum á jörðinni og afhenti Höllu.
Halla geislaði þó umfram allt af gleði og veifaði nýfengnum pappafánanum.
Konungurinn sagði síðan í ræðu sinni að tengsl landanna tveggja hefðu aldrei verið sterkari.
„Við erum meira en vinir, nágrannar og samstarfsaðilar – við erum nú bandamenn. Grimmileg innrás Rússlands veldur gífurlegum þjáningum hjá úkraínsku þjóðinni. Hún er einnig alvarleg ógn við frelsi okkar og öryggi. Norðurlöndin standa sameinuð í óbilandi stuðningi okkar við Úkraínu,“ sagði hann.
Halla hafði gleymt lesgleraugum sínum. Þegar kom að ræðu hennar gerði hún látlaust merki til konu í sendinefnd og fékk að láni gleraugu til að geta lesið ræðuna. Síðar komu hennar eigin gleraugu í leitirnar. „Sjáið hvernig vinátta okkar birtist í verki,“ sagði hún glaðlega. „Vinátta okkar á rætur í trausti, sameiginlegum gildum og djúpri samkennd,“ sagði forsetinn og benti á málefni eins og loftslagsvána, aukna ógn við lýðræðið, mannréttindi og öryggismál í Evrópu sem megináherslur heimsóknarinnar.
Í lýsingu Aftonbladet kemur fram að þegar forsetahjónin settust upp í bílalest á leið til næsta viðburðar hafi slæðingur af íslenskum pappafánum fokið eftir jörðinni í hallargarðinum.
Á morgun mun Halla heimsækja Karolinska háskólasjúkrahúsið og kynna sér þar lækningatæki og tækninýjungar. Þá verður haldið í Viðskiptaháskólann í Stokkhólmi og mun Halla taka þátt í samtali um hæfni leiðtoga framtíðarinnar. Síðan heldur hún í ráðhúsið í Stokkhólmi, fer í Konunglega tækniháskólann, í Kvikmyndahúsið svokallaða. Á lokadeginum á fimmtudag heimsækir Halla og föruneyti bæinn Torsåker, þar sem rekin er þróunarstöð fyrir matvæli framtíðar með áherslu á sjálfbærni, umhverfisvernd og lýðheilsu.
Athugasemdir