Íslenska haustið sýnir klærnar í dag

Það verður heldur haust­legt um að lit­ast víða um land í dag, með skúrum og jafn­vel slydd­ué­ljum á köflum.

Í hug­leið­ingum veð­ur­fræð­ings Veð­ur­stofu Íslands kemur fram að dálítil lægð sé á Græn­lands­hafi og hæð vestur af Írlandi. Saman beina þessi kerfi suð­vest­lægri átt yfir landið.

Suð­vest­an­átt verður 8–13 metrar á sek­úndu og víða kaldi eða stinn­ings­kaldi. Hitinn verður ekki til að hrópa húrra fyrir, en gert er ráð fyrir 1–7 stigum yfir dag­inn.

Skúrir verða víða og sums staðar slydd­uél, en íbúar á Norð­austur- og Aust­ur­landi sleppa betur og þar verður að mestu bjart.

Á morgun verður suð­vestan- og sunn­an­átt, 5–13 metrar á sek­úndu. Súld eða dálítil rign­ing verður með köflum en lengst af ætti að hald­ast þurrt norð­aust­an­lands.

Það hlýnar jafn­framt í veðri á morgun, en vest­an­lands bætir í úrkomu þegar líður á kvöldið.