Nokkur mál komu á borð lögreglu í nótt og greindi hún frá því í dagbók sinni. Segir hún meðal annars frá því að ökumaður hafi verið stöðvaður vegna gruns um akstur undir áhrifum vímuefna. Þegar lögregla ætlaði að gefa sig á tal við ökumanninn reyndist hann svo vímaður að bifreið hans rann á lögreglubifreiðina og tjónaði hana. Hann var svo vistaður í fangageymslu vegna atviksins.
Hótelstarfsmaður í miðborginni óskaði aðstoðar lögreglu vegna manns sem hafði leigt herbergi hjá þeim í tæpa viku. Þegar komið var að greiða reyndist greiðslukort aðilans stolið og hann ekki borgunarmaður fyrir reikningnum.
Lögreglan hafði eftirlit með ökumönnum sem óku frá ótilgreindum golfvelli á höfuðborgarsvæðinu. Reyndust fjórir ökumenn hafa fengið sér drykk við íþróttaiðkunina og þeim gert að hætta akstri. Þeir voru þó allir undir refsimörkum að sögn lögreglu.
Tilkynnt var um grunsamlegar mannaferðir við sjoppu í austurbænum. Er lögreglu bar að voru aðilarnir búnir að brjóta sér leið inn í sjoppuna. Þeir voru handteknir og gista nú fangageymslur lögreglu.
Athugasemdir