Mikil umræða hefur skapast undanfarna mánuði um ferðamennsku víðs vegar á landinu og hefur aukin umferð og hegðun bílstjóra verið hluti af þeirri umræðu. Telja sumir að aukin hætta hafi skapast á landinu vegna fjölda ferðamanna.
Í þessu samhengi birti Agla Björnsdóttir myndband af langferðabíl á ferð um Suðurland en óhætt er að segja að ökumaður bílsins hafi ekki farið að umferðarlögum eins og sést í myndbandinu.
„Í ljósi þess að ég ek oft um Suðurlandið, er alin upp í Mýrdalnum og þekki því vel þessa leið, þá ákvað ég að birta myndband sem ég tók á fimmtudaginn á Markarfljótsaurunum. Það verða alltof mörg slys á hringveginum og sér í lagi á Suðurlandi og því þarf alltaf að hafa varann á sér á þessari leið,“ skrifar Agla.
„Alþekktu dæmin eru við Seljalandsfoss og afleggjarann að Skógum, þar er alltof oft sem bílar aka upp á þjóðveginn í veg fyrir aðra bíla, stundum hafa orðið slys en stundum hefur bílstjórum rétt tekist að sleppa við árekstur. Dóttir mín og tengdasonur aka mjög oft á milli Hafnar í Hornafirði og Reykjavíkur og er ég alltaf mjög áhyggjufull og brýni fyrir þeim í hvert sinn að vara sig á þessum stöðum sem ég nefndi hér fyrir ofan,“ heldur hún áfram.
Aðrar rútur fóru ekki yfir línuna
„Þegar ég sé svo ferðaþjónustufyrirtæki aka nær alla Markarfljóstaurana á vinstri helming og færa sig ekki yfir á hægri akrein fyrr en rétt áður en þeir mæta bíl, þá blöskrar mér. Hvað með ef ökumennirnir sem koma á móti, fara í “panikk” og fara yfir á rangan vegarhelming, sveigja út af osfrv. – þá er ekki að spyrja að leikslokum. Einhverjir kunna að spyrja: Var rok – er það þess vegna sem bíllinn var á öfugum vegarhelming?“ spyr Agla og segir að það hafi vissulega verið rok en ekki hafi verið hvasst fyrr en komið var fram hjá Seljalandsfossi.
„Bíllinn var búinn að keyra á miðjum veginum lengi áður en hann keyrði alfarið á vinstri akgrein og ég ákvað þá að taka upp þetta myndband. Það voru aðrar rútur að keyra þessa sömu leið, bæði litlar og stórar rútur og engin þeirra fór yfir punktalínuna til að verjast vindi – enda óþarfi,“ tekur hún fram í færslunni.
„Það má vel kalla mig nöldrara, tuðara eða konu sem kunni ekki að keyra og hafi ekki vit á stórum bílum í akstri – en ef hegðun bílstjóra hjá ferðaþjónustufyrirtæki skapar hættu fyrir mig og aðra, þá finnst mér rétt að vekja athygli á því. Ef bílstjórar treysta sér ekki til að aka ef einhver vindur er, þá eiga þeir ekki að taka verkefnið að sér. Hitt er svo annað mál – að á þessari fjölförnu leið sem suðurlandsvegur er, þá þarf að tvöfalda aksturslínur í báðar áttir,“ skrifar hún svo að lokum.
Athugasemdir