Einar Þorsteinsson, fyrrverandi borgarstjóri Reykjavíkur, er einn þeirra sem minnast Davíðs Oddssonar, fyrrum forsætisráðherra og borgarstjóra, á samfélagsmiðlum í dag en Davíð lést í gær.
„Ég bauð Davíð Oddssyni í hádegismat á skrifstofuna þegar ég var borgarstjóri,“ skrifar Einar á samfélagsmiðla. „Ég var örlítið óviss um hvernig hádegisverðurinn yrði því síðustu samskipti okkar voru eftir kappræður daginn fyrir forsetakosningarnar 2016 og þar var hann frekar ósáttur við rimmu sem við áttum í þættinum. „Davíð gleymir engu“ hugsaði ég,“ skrifar borgarstjórinn fyrrverandi.
„Ég ákvað þó að bjóða honum í ráðhúsið því mér þótti áhugavert að ræða við hann um borgarmálin. Hann þáði boðið undir eins enda hafði honum aldrei áður verið boðið á skrifstofu borgarstjóra í ráðhúsinu við Tjörnina sem hann þó hafði forgöngu um að yrði byggt. Hann sagðist frekar vilja fisk en kjöt því hann væri að passa upp á heilsuna. Ég fann að honum þótti vænt um að vera boðið,“ heldur hann áfram.
„Það var gaman að hitta Davíð, hann var stór karakter sem mótaði stjórnmál æsku minnar kynslóðar. Davíð fór á kostum í hádegisverðinum, sagði frá hinum og þessum uppákomum í borgarstjóratíð sinni, meðal annars því þegar hann fékk fjarstýringu að gosbrunninum í Tjörninni og notaði hana til að kveikja á honum og bregða fólki sem gekk framhjá,“ skrifaði hann að lokum og vottaði fjölskyldu og vinum Davíðs samúð sína.
Athugasemdir