Sænsk yfirvöld hafa ákært 18 ára gamlan mann fyrir umfangsmikil netafbrot sem tengjast alþjóðlegu ofbeldisneti á internetinu. Samkvæmt sænsku ákæruvaldinu er maðurinn grunaður um 77 brot, þar á meðal tilraun til manndráps, hvatningu til sjálfsvígs, dreifingu barnaníðsefni og dýraníð. Öll brotin voru framin í gegnum netið og náðu til fórnarlamba í nokkrum löndum.
Málið tengist svokölluðu „The Com“-samfélagi á netinu, lauslega skipulögðu neti hópa sem hvetja til ofbeldis og sjálfsskaða. Þar á meðal er hópurinn „764“, sem bandaríska alríkislögreglan FBI hefur skilgreint sem alþjóðlegt barnaníðs- og öfgasamtök.
Saksóknarinn Jenny Ostling sagði að gerendur innan netsins beindu sjónum sínum að viðkvæmum einstaklingum, einkum börnum og ungmennum á samfélagsmiðlum, leikjaveitum og vettvangi þar sem rætt er um geðheilbrigði og sjálfsskaða. Hún nefndi sérstaklega tölvuleikjamiðilinn Roblox sem dæmi um vettvang þar sem slíkir einstaklingar væru markvisst nálgaðir.
Samkvæmt ákærunni á maðurinn meðal annars að hafa hvatt dreng undir 15 ára aldri til að stinga 82 ára gamlan mann í bakið árið 2024. Drengurinn var síðar fundinn sekur um verknaðinn en hlaut enga refsingu þar sem hann var undir sakhæfisaldri í Svíþjóð.
Einnig er maðurinn sakaður um að hafa neytt ástralska stúlku til sjálfsskaða og hvatt hana til sjálfsvígs, auk þess að hafa fengið mann í Þýskalandi til að valda sér lífshættulegum áverkum.
Réttarhöldin eru talin fordæmisgefandi í Svíþjóð þar sem reynt verður á hvort ofbeldisbrot geti verið framin með óbeinum hætti í gegnum internetið.
Athugasemdir