Við Birkihæð 12 í Garðabæ er nú komið á sölu algjörlega endurnýjað og afar glæsilegt 188,5 fermetra endaraðhús á einni hæð. Eignin stendur á eftirsóttum útsýnisstað þar sem nýtur víðáttumikils útsýnis yfir sjóinn, að Bessastöðum og víðar.
Húsið var byggt árið 1992 en gekkst undir umfangsmiklar endurbætur árið 2024 þar sem það var innréttað upp á nýtt frá grunni með vönduðum efnum og mikilli áherslu á hönnun og gæði. Ásett verð eignarinnar er 245 milljónir króna, sem jafngildir um 1,3 milljónum króna á fermetra. Það er Sigfús Bjarni Sigfússon, fyrrum forstjóri Hertz, sem selur húsið.
Við endurnýjunina var skipulagi hússins breytt, lagt nýtt gólfhitakerfi um allt hús, raflagnir og rafmagnstöflur endurnýjaðar og ný inntaksgrind sett upp. Þá var einnig settur nýr stór forhitari, ný gólfefni lögð og allar innréttingar endurnýjaðar. Í eldhúsi voru sett upp ný tæki og á baðherbergjum ný vönduð innbyggð tæki.
Mikil lofthæð setur sterkan svip á eignina en bitar í loftum voru hækkaðir við framkvæmdirnar og nýr hljóðdúkur settur í öll loft. Öll lýsing í húsinu var hönnuð af Lumex og ljósabúnaður og rofar valdir af vandvirkni. Þá hefur loftræstikerfi hússins verið yfirfarið og endurnýjað.
Að utan er húsið einnig sagt í góðu ástandi. Þakpappi hefur verið endurnýjaður og skipt hefur verið um rennihurðir ásamt gleri og gluggum á suðurhlið hússins að mestu leyti.
Lóðin hefur fengið töluverða upplyftingu með nýendurgerðri hellulagðri innkeyrslu, yfirfarinni snjóbræðslu og nýrri stýringu. Á baklóðinni er stór og skjólsæl viðarverönd með skjólveggjum og heitum potti þar sem nýtur glæsilegs útsýnis yfir sjóinn, að Bessastöðum og Reykjanesi.
Athugasemdir