Eyjólfur Ármannsson innviðaráðherra og Jón Gunnar Jónsson, forstjóri Samgöngustofu, tóku í gær þátt í verklegri þjálfun sjómanna um borð í Sæbjörgu, skólaskipi Slysavarnaskóla sjómanna. Þjálfunin er hluti af þeirri menntun og þjálfun sem sjómenn þurfa að ljúka til að geta verið lögskráðir í áhöfn skips.
Þetta kemur fram í tilkynningu frá stjórnvöldum. Þar segir að ráðherrann og forstjórinn hafi tekið þátt í kennslustund ásamt nemendum skólans, þar sem lögð var áhersla á öryggis- og björgunarþjálfun á sjó.
Eitt af meginverkefnum dagsins fólst í því að stökkva í sjóinn á ytri höfninni í Reykjavík og taka þátt í björgunaræfingu. Að æfingunni lokinni voru þeir hífðir um borð í þyrlu Landhelgisgæslunnar, líkt og gert er við raunverulegar aðstæður þegar þyrla er kölluð út til björgunarstarfa á sjó.
„Það var magnað að taka þátt í þessari mikilvægu æfingu í Slysavarnaskólanum og fylgjast með einstöku fagfólki að störfum. Við höfum náð ákaflega góðum árangri við að fækka slysum og dauðsföllum á sjó og Slysavarnaskólinn á sinn mikilvæga þátt í þeim árangri. Við megum þakka fyrir að hafa skapað sterka öryggismenningu á sjó með samstilltu átaki einstaklinga, félagasamtaka og stjórnvalda – og ekki síst sjómanna sjálfra. Þetta var mikil lífsreynsla og nauðsynleg innsýn í námið í Slysavarnaskólanum,” segir Eyjólfur Ármannsson innviðaráðherra.
Athugasemdir