Fallegt tveggja hæða einbýlishús við Tunguveg 21 í Reykjavík hefur verið sett á sölu. Um er að ræða 173,9 fermetra eign, þar af 36 fermetra bílskúr, sem reist var árið 1960. Ásett verð er 139,9 milljónir króna.
Húsið stendur á vinsælum og skjólgóðum stað í hverfi 108 Reykjavík og hefur fengið gott viðhald í gegnum árin. Eignin er skráð fimm til sex herbergja, en á efri hæð eru í dag þrjú svefnherbergi eftir að tvö herbergi voru sameinuð í eitt stærra.
Á neðri hæð tekur á móti gestum anddyri með skápum og flísalögðu gólfi. Þaðan er gengið inn í hol sem tengir saman stofu og sjónvarpsstofu með parketi á gólfum. Eldhúsið er snyrtilegt með hvítri innréttingu og korki á gólfi. Úr eldhúsi er innangengt í þvottahús með útgengi út í garð. Baðherbergi á neðri hæð er búið sturtuklefa, innréttingu, salerni og handklæðaofni.
Eitt af helstu aðdráttaröflum eignarinnar er stór og skjólgóður bakgarður. Þar standa tveir geymslukofar sem fylgja með kaupunum, annar 3x3 metrar að stærð og hinn 2x2,9 metrar.
Talsvert hefur verið lagt í endurbætur á undanförnum árum. Skipt var um frárennslislagnir út í götu, gluggar á báðum hæðum voru endurnýjaðir árið 2021 og sama ár var skipt um járn á þaki og þakrennur. Þá var húsið málað að utan árið 2024.
Eignin er staðsett miðsvæðis á höfuðborgarsvæðinu með góðum tengingum við helstu stofnbrautir auk göngu- og hjólaleiða. Stutt er í skóla og aðra þjónustu, sem gerir húsið að áhugaverðum kosti fyrir fjölskyldur sem leita að rúmgóðu heimili á eftirsóttum stað í Reykjavík.
Athugasemdir