Ingunn Rut Sigurðardóttir, unnusta Andra Más Mortensen Birgissonar og ein sex ákærðu í svokölluðu Reykholtsmáli, játaði við aðalmeðferð málsins í dag sakargiftir er varða frelsissviptingu brotaþola en RÚV greindi frá málinu.
Hún kaus að svara ekki spurningum.
Ingunn Rut neitaði því að hafa sjálf beitt brotaþola ofbeldi en sagðist hafa vitað að hann hefði verið beittur ofbeldi í þeim tilgangi að ná af honum fé. Hún neitaði jafnframt broti gegn vopnalögum og sagði fíkniefni sem fundust við rannsókn málsins hvorki hafa verið í hennar eigu né Andra Más.
Hún viðurkenndi að þáttur hennar í málinu hefði valdið brotaþola miklum skaða en mótmælti fjárhæð bótakröfu hans. Þá sagði hún játninguna koma seint fram en lagði áherslu á að ákvörðunin væri hennar eigin.
Ingunn Rut sagðist hafa verið í fíkniefnaneyslu þegar atburðirnir áttu sér stað og nefndi það sem mögulega skýringu á þátttöku sinni, þó ekki sem afsökun.
Sex Íslendingar, fimm karlar og ein kona, eru ákærðir fyrir að hafa svipt mann frelsi sínu í Reykholti í apríl 2024, kúgað af honum fé og beitt hann margþættu ofbeldi.
Búist er við að allir ákærðu ljúki skýrslugjöf í dag.
Athugasemdir