Glæsileg 135,8 fermetra efri sérhæð við Fellahvarf 16 í Kópavogi hefur verið sett á sölu. Ásett verð eignarinnar er 126,9 milljónir króna en hún er í fallegu klasahúsi sem reist var árið 2005.
Um er að ræða fjögurra til fimm herbergja íbúð með sérinngangi og víðáttumiklu útsýni til suðurs yfir Elliðavatn og til fjalla. Íbúðin er í Hvörfunum í Kópavogi, í lokuðum botnlanga skammt frá fjölbreyttum útivistarsvæðum.
Í eigninni eru þrjú svefnherbergi en mögulegt er að útbúa fjórða svefnherbergið með því að minnka stofurýmið. Alrými íbúðarinnar er rúmgott og skiptist annars vegar í stóra stofu með setu- og borðstofu og hins vegar sjónvarpsstofu. Úr stofunni er gengið út á rúmgóðar svalir sem snúa til suðurs og bjóða upp á útsýni yfir Elliðavatn og nágrennið.
Eldhúsið er með vönduðum innréttingum, graníti á borðum, undirfelldum vaski og stórri eldhúseyju. Innfelld lýsing er víða í íbúðinni. Þá er þar rúmgott baðherbergi auk þvottaherbergis og geymslu inn af eldhúsinu.
Fyrir framan húsið er hellulögð stétt með snjóbræðslu og sameiginleg bílastæði eru á lóðinni. Tvö sérmerkt bílastæði fylgja eigninni og eru þau staðsett á framlóðinni næst inngangi.
Stutt er frá Fellahvarfi í leik- og grunnskóla og íþróttasvæðið við Kórinn er í göngufæri. Þá eru verslun og þjónusta í næsta nágrenni auk hjóla- og gönguleiða við Elliðavatn.
Ásett verð, 126,9 milljónir króna, jafngildir rúmlega 934 þúsund krónum á fermetra.
Athugasemdir