Héraðsdómur Reykjavíkur hefur sýknað Rekstrarfélag Kringlunnar af kröfum Híbýla ehf. vegna húsgjalda sem fyrirtækið taldi sig hafa ofgreitt vegna auglýsinga- og kynningarstarfsemi Kringlunnar. Híbýlum var jafnframt gert að greiða 1,6 milljónir króna í málskostnað.
Híbýli krafðist aðallega endurgreiðslu á rúmlega 1,7 milljónum króna auk vaxta. Til vara var krafist tæplega 965 þúsund króna og til þrautavara rúmlega 110 þúsund króna.
Híbýli er staðsett í skrifstofuhúsnæði í Kringlunni en eigandi þess er Ingibjörg Þórðardóttir, stjórnarformaður félagsins og löggiltur fasteignasali.
Ágreiningurinn snerist um þann hluta húsgjalda sem fór í auglýsinga- og kynningarstarfsemi Kringlunnar. Híbýli taldi að slíkur kostnaður tengdist fyrst og fremst verslunum og veitingastöðum og að fyrirtækinu væri ekki skylt að taka þátt í honum.
Rekstrarfélag Kringlunnar hélt því hins vegar fram að kostnaðurinn væri hluti af sameiginlegum rekstrarkostnaði samkvæmt samþykktum félagsins.
Héraðsdómur vísaði meðal annars til dóms Hæstaréttar frá október 2025 í sambærilegu máli. Þar var komist að þeirri niðurstöðu að heimilt væri að skilgreina auglýsinga- og kynningarkostnað sem sameiginlegan kostnað Kringlunnar.
Lykilatriði í máli Híbýla var hvort félagið hefði vitað eða mátt vita af fyrirkomulaginu þegar húsnæðið var keypt árið 2014. Dómurinn taldi sannað að Ingibjörg hefði þá haft vitneskju um gjald vegna markaðskostnaðar og haft tækifæri til að kynna sér grundvöll gjaldtökunnar nánar.
Dómurinn benti sérstaklega á að Ingibjörg væri löggiltur fasteignasali með áratugareynslu og hefði því mátt gera sér grein fyrir mikilvægi þess að afla upplýsinga um gjaldtökuna áður en kaupin voru frágengin.
Rekstrarfélag Kringlunnar var því sýknað af öllum kröfum Híbýla.
Athugasemdir