Lögreglan á höfuðborgarsvæðinu hafði í ýmsu að snúast í dag. Meðal verkefna voru líkamsárás á leigubílstjóra, innbrot í bifreiðar og verslun, fíkniefnaakstur og þjófnaðir úr verslunum.
Tilkynnt var um að ráðist hefði verið á leigubílstjóra í póstnúmeri 105 í Reykjavík. Málið er til rannsóknar hjá lögreglu og liggja ekki fyrir frekari upplýsingar um atvik eða möguleg meiðsl ökumanns.
Nokkur innbrot voru einnig tilkynnt. Brotist var inn í bifreið í póstnúmeri 105 og annað sambærilegt mál kom upp í póstnúmeri 108. Þá bárust tvær tilkynningar um innbrot í bifreiðar í póstnúmeri 109. Öll málin eru til rannsóknar.
Í miðborg Reykjavíkur var tilkynnt um innbrot í verslun. Grunaður gerandi var handtekinn skömmu síðar og er málið til rannsóknar.
Lögregla sinnti jafnframt nokkrum málum vegna þjófnaðar úr verslunum. Tvö slík mál komu upp í póstnúmeri 105 og eitt í póstnúmeri 112. Í öllum tilvikum var meintur gerandi enn á vettvangi þegar lögreglu bar að garði.
Tveir ökumenn voru handteknir vegna gruns um akstur undir áhrifum ávana og fíkniefna. Annað málið kom upp í póstnúmeri 108 en þar fundust einnig fíkniefni á ökumanninum. Hitt málið kom upp í póstnúmeri 221. Ökumennirnir voru fluttir á lögreglustöð til hefðbundinnar málsmeðferðar.
Þá var ökumaður stöðvaður fyrir akstur án ökuréttinda í póstnúmeri 105 og málið afgreitt á vettvangi. Annar ökumaður var kærður í póstnúmeri 210 fyrir að tala í farsíma við akstur án þess að nota handfrjálsan búnað.
Einnig var tilkynnt um umferðaróhapp í póstnúmeri 105 og ritaði lögregla skýrslu vegna þess.
Að lokum handtók lögregla erlendan einstakling í póstnúmeri 110 vegna gruns um ólögmæta dvöl hér á landi. Hann var fluttur á lögreglustöð og er málið til rannsóknar.
Athugasemdir