Einbýlishús með óvenjulegu skipulagi og hönnun er nú til sölu fyrir 86 milljónir króna en um er að ræða Kelduskóga 4 á Egilsstöðum. Húsið er 213,5 fermetrar að stærð, á tveimur hæðum og var byggt árið 2004.
Hönnun hússins er ekki af þeirri gerð sem sést á hverju strái hér á landi. Húsið er meðal annars með stórum, 52,6 fermetra tvöföldum bílskúr og lítilli íbúð á jarðhæð, auk þess sem helstu sameiginlegu rými heimilisins eru á efri hæðinni.
Þar eru eldhús og borðstofa í rúmgóðu og opnu rými og þaðan er bæði gengið út á svalir að framanverðu og timburverönd í bakgarðinum. Við hliðina er stofa og er opið á milli hennar og eldhússins. Þrjú rúmgóð svefnherbergi eru á hæðinni og fataherbergi inn af einu þeirra. Baðherbergið er flísalagt og búið baðkari með sturtu.
Á neðri hæðinni er forstofa og þaðan innangengt í hinn rúmgóða tvöfalda bílskúr. Tvær bílhurðir eru á bílskúrnum og geymslur innst í honum.
Sérstaða eignarinnar felst einnig í lítilli íbúð sem útbúin hefur verið á neðri hæðinni. Þar eru tvö herbergi, sérbaðherbergi og lítill eldhúskrókur.
Alls eru fimm svefnherbergi í húsinu og skipulagið býður því upp á fjölbreytta nýtingarmöguleika. Ásett verð eignarinnar er 86 milljónir króna.
Athugasemdir