Mikið endurnýjað einbýlishús við Svarfaðarbraut 12 á Dalvík hefur verið sett á sölu. Um er að ræða 181,2 fermetra fimm herbergja hús með bílskúr, en ásett verð er 81,9 milljónir króna.
Húsið var reist árið 1970 og stendur á gróinni lóð miðsvæðis á Dalvík. Eignin er á pöllum og skiptist meðal annars í fjögur svefnherbergi, stofu, eldhús, borðstofu, hol, baðherbergi, þvottahús og nokkur geymslurými.
Stofan er björt með stórum gluggum og parketi á gólfum. Í eldhúsinu er dökk innrétting með góðu skápaplássi, keramikhelluborði og bakaraofni í vinnuhæð. Þrjú svefnherbergi eru á efri palli hússins en fjórða herbergið er á neðri palli.
Baðherbergið hefur nýlega verið endurnýjað og er þar meðal annars ný innrétting, vegghengt salerni, innangeng sturta með dökku gleri og handklæðaofn.
Þvottahúsið er í bílskúrnum og hefur þar verið komið fyrir nýlegri sérsmíðaðri innréttingu frá Brúnás. Gert er ráð fyrir þvottavél og þurrkara í vinnuhæð.
Við húsið er stór og gróinn garður auk nýlegs sólpalls. Þá hafa lagnir þegar verið lagðar út fyrir heitum potti, sem gefur nýjum eigendum möguleika á að bæta honum við útisvæðið.
Fjölmörg geymslurými eru í húsinu, meðal annars undir stiga og á tveimur háaloftum. Bílskúrinn er með steyptu gólfi og nýlegri bílskúrshurð.
Ásett verð eignarinnar er 81,9 milljónir króna, sem jafngildir rúmlega 452 þúsund krónum á fermetra miðað við uppgefið heildarflatarmál.
Athugasemdir