Rijksmuseum í Amsterdam setti í dag til sýnis sjaldgæfan smokk frá um 1830, sem prýddur er erótískri mynd af nunnu og þremur klerkum í ögrandi stellingum.

Forna getnaðarvarnartækið er líklega úr innyflum kindar og kann að hafa verið minjagripur frá vændishúsi en aðeins tvö þekkt eintök eru til, að sögn safnsins í yfirlýsingu.

„Það sýnir að prentverk höfðu margvísleg not og gefur innsýn í kynlíf og vændi á 19. öld,“ samkvæmt safninu. Safnið sagði að smokkurinn væri sýndur sem hluti af sýningu um vændi og kynlíf á 19. öld.

Prentið á smokknum sýnir nunnu lyfta pilsinu og benda fingri sínum að þremur klerkum, sem einnig sýna kynfæri sín.

„Það sýnir bæði léttari og dekkri hliðar kynheilbrigðis,“ sagði safnið.

Rijksmuseum tók fram að smokkurinn sé frá tímabili þar sem kynlíf var „hlaðið ótta við óvelkomna meðgöngu og kynsjúkdóma og þá sérstaklega sárasótt.“

Prentsafn safnsins inniheldur um 750.000 prent og teikningar.

„Þetta er fyrsta dæmið í safneign Rijksmuseum um prent á smokk,“ segir í yfirlýsingunni.