Lögreglumenn höfðu afskipti af aðila sem var sjáanlega í annarlegu ástandi að angra vegfarendur með köllum og öskrum. Þegar lögregla hafði afskipti af viðkomandi brást hann illa við og var með ógnandi tilburði í garð lögreglu. Var hann handtekinn og fluttur á lögreglustöð sökum ástands þar sem hann var vistaður í fangaklefa þar til rynni af honum.
Þjófnaður var tilynntur á veitingastað í miðborginni og tilkynnt var um aðila sem var til ama við félagslegt úrræði. Er lögreglu bar að garði þekkti lögregla hann vegna fyrri afskipta. Við öryggisleit á aðilanum fundust tveir hnífar í fórum hans. Hann fluttur á lögreglustöð þar sem skýrsla var tekin af viðkomandi fyrir vopnalagabrot og hann laus að skýrslutöku lokinni.
Höfð voru afskipti af ungmenni í annarlegu ástandi í strætóskýli og brást viðkomandi illa við afskiptum við lögreglu og fór að veitast að lögreglu með höggum og hrákum. Og var viðkomandi færður á lögreglustöð þar sem málið var afgreitt með aðkomu forráðamanna.
Lögregla hafði einnig afskipti af aðila er var að veitast að vegfarendum með höggum fyrir utan skemmtistað. Aðilinn var handtekinn og fluttur á lögreglustöð enda í annarlegu ástandi; vistaður í fangaklefa þar til hægt verður að ræða við hann.
Höfð afskipti af manni sem var sofandi í framsæti í bifreið. Þegar lögregla ræddi við viðkomandi vaknaði grunur um að hann væri undir áhrifum vímuefna og að hugsanlega væru meint vímuefna að finna í bifreiðinni. Heimilaði viðkomandi leit og fannst mikið magn af meintum vímuefnum og fjármunum í fórum hans. Viðkomandi var vistaður í fangaklefa fyrir rannsókn málsins.
Tilkynnt var um umferðarslys þar sem bíll endaði utan vegar og var ökumaður fluttur á slysadeild vegna minniháttar eymsla og dráttabíll var kallaður til að flytja bifreiðina af slysstað.
Tilkynnt var um hugsanlegan ölvaðan ökumann. Sú tilkynning reyndist á rökum reist er lögregla stöðvaði viðkomandi við akstur. Viðkomandi var færður í viðeigandi ferli og laus að blóðsýnatöku lokinni.
Tilkynnt um bifreið sem var rásandi - lögregla stöðvaði bifreiðina við akstur og reyndist ökumaður ölvaður við akstur og akandi án réttinda. Þar að auki var viðkomandi ungmenni og var málið leyst með aðkomu forráðamanna. Að blóðsýnatöku lokinni var viðkomandi laus úr haldi lögreglu.
Þá var tilkynnt um líkamsárás; en óljóst hverjir væru gerendur í málinu; viðkomandi fluttur á slysadeild með minniháttar áverka og er málið í rannsókn.
Tilkynnt var um eld í bifreið við matvöruverslun og þegar lögregla kom á vettvang var enga bifreið að sjá sem passaði við brennandi lýsinguna.
Heilt yfir gekk menningarnótt friðsamlega og vel fyrir sig. Að flugeldasýningu lokinni voru leiðir greiðar frá miðbænum er fólk hélt heim á leið. Mikið mannlíf í miðbæ Reykjavíkur í kringum dagskrá menningarnætur og sýnileg löggæsla víðsvegar um miðbæinn í takt við það.
