Tveir menn hafa verið handteknir í New York eftir að hafa sést skríða upp úr holræsi í miðri borginni. Atvikið er það nýjasta í röð dularfullra atvika þar sem fólk hefur sést koma upp úr neðanjarðarkerfi borgarinnar undanfarna mánuði.
Lögreglan í New York (NYPD) handtók á fimmtudag þá Kevin Rodriguez, 26 ára, og Samuel Reveron, 25 ára, en þeir eru báðir búsettir í Queens-hverfinu. Þeir eru ákærðir fyrir samsæri og húsbrot (e. trespassing) eftir að tilkynnt var um þrjá menn að koma upp úr holræsi snemma á miðvikudagsmorgun. Mennirnir flúðu af vettvangi þegar lögreglu bar að garði.
Öryggisviðbúnaður vegna Netanyahu
Atvikið vakti mikla athygli og sérstaka varúð yfirvalda þar sem mennirnir komu upp úr holræsakerfinu rétt hjá hóteli þar sem Benjamin Netanyahu, forsætisráðherra Ísraels, átti að gista á meðan á Allsherjarþingi Sameinuðu þjóðanna stóð.
Vegna viðkvæmrar staðsetningar og tímasetningar framkvæmdi lögreglan, ásamt alríkislögreglunni, strangar öryggisleitar á svæðinu. Lögreglan telur þó að atvikið tengist fremur svokölluðum „skólpleitarmönnum“. Algengt er að fólk fari ofan í holræsin í leit að verðmætum og málmum sem skolað hefur niður í stormum.
Lýsa yfir sakleysi
Mennirnir tveir komu fyrir dómara á föstudagsmorgun þar sem þeir lýstu yfir sakleysi sínu. Þeim hefur verið sleppt úr haldi á meðan málið er í vinnslu. Enn er leitað að þriðja manninum sem var með þeim í för.
Svipuð atvik hafa ítrekað átt sér stað í New York undanfarið. Í ágúst sáust þrír menn í vinnugöllum og með ennisljós koma upp úr holræsi nálægt Penn Station og í maí náðust myndbönd af hópi fólks fara ofan í holræsi í Suður-Brooklyn.
Lífshættuleg iðja
Umhverfisverndarstofnun New York-borgar varar almenning sterklega við því að fara ofan í holræsakerfið. Rýmin séu þröng og þar leynist mikil hætta á eitruðum lofttegundum og skyndilegum flóðum. Að ganga þar um er bæði ólöglegt og stórhættulegt, en fyrr á árinu varð hörmulegt slys í miðborg Manhattan þegar kona lést eftir að hafa fallið fyrir slysni ofan í opið holræsi.
