Hópur ungmenna réðst á tvo einstaklinga í Mjóddinni í Breiðholti í gærkvöldi. Annar þolendanna, 15 ára gamall, var fluttur á sjúkrahús eftir að hafa fengið glerflösku í höfuðið.

Tilkynning um alvarlega líkamsárás barst lögreglunni á höfuðborgarsvæðinu á ellefta tímanum í gærkvöldi. Samkvæmt upplýsingum frá lögreglu veittist hópur ungmenna, flest á aldrinum 15 til 20 ára, að tveimur einstaklingum öðrum 15 ára og hinum á sextugsaldri.

Ofbeldið stigmagnaðist fljótt þar sem glerflöskur komu við sögu, en átökin leiddu til þess að 15 ára unglingurinn fékk glerflösku í höfuðið. Hann var fluttur með sjúkrabíl til aðhlynningar á sjúkrahúsi.

Þekktust líklega innbyrðis

Unnar Már Ástþórsson, aðalvarðstjóri hjá lögreglunni á höfuðborgarsvæðinu, segir í samtali við RÚV að svo virðist sem ungmennin hafi þekkt fólkið sem ráðist var á. Hann staðfestir jafnframt að flestir gerendurnir hafi verið undir lögaldri og að lögreglan hafi áður haft afskipti af mörgum þeirra vegna annarra mála.

Unnið með barnavernd og foreldrum

Vegna ungs aldurs gerenda verður eftirfylgni málsins með sérstöku sniði. „Þetta verður unnið með barnaverndaryfirvöldum og foreldrum í langflestum tilvikum,“ segir Unnar Már um næstu skref í rannsókninni og meðhöndlun málsins.