Héraðsdómur Reykjavíkur hefur dæmt mann, Ali Reza Husseini, í 30 daga skilorðsbundið fangelsi fyrir líkamsárás á tvo drengi á skyndibitastað í Reykjavík í apríl í fyrra.

Samkvæmt dómi réðst maðurinn, sem er á fullorðinsaldri, að drengjunum á stað sem í dómnum er nefndur Kjúklingastaðurinn C. Hann sló annan þeirra með hnefa í andlitið, með þeim afleiðingum að hann hlaut opið sár á höfði. Hinn drengurinn var sleginn ítrekað í höfuð og líkama og hlaut meðal annars opið sár á höfði og mar á bak við eyra.

Ákærði játaði brot sín skýlaust fyrir dómi og var málið því dæmt án frekari sönnunarfærslu. Í dóminum kemur fram að drengirnir hafi verið börn að aldri og að árásin hafi átt sér stað að litlu sem engu tilefni.

Héraðsdómur tók mið af játningu ákærða við ákvörðun refsingar en taldi ekki unnt að líta til mildandi ákvæða vegna alvarleika brotsins og ungs aldurs brotaþola. Refsing var ákveðin 30 daga fangelsi, skilorðsbundið til tveggja ára.

Hinn dæmdi var jafnframt gert að greiða öðrum brotaþolanum 200 þúsund krónur í miskabætur og 175 þúsund krónur í málskostnað. Þá þarf hann að greiða rúmlega hálfa milljón króna í málsvarnarlaun og annan sakarkostnað.

Í dóminum kemur fram að ákærði hafi áður verið dæmdur til sektar vegna brots á lögum um siglingavernd árið 2021 en hafi að öðru leyti hreint sakavottorð.