Kristín Gunnarsdóttir hefur verið ráðin forstöðumaður Upplýsingamiðlunar, nýrrar deildar á sviði Samskipta og menningar sem tekur til starfa í lok febrúar en greint er frá þessu í tilkynningu frá Landsbankanum.
Athygli vekur að ekkert er minnst á það í tilkynningunni hvað menningarhlutanum er ætlað að gera.
„Markmið nýrrar deildar er að efla samræmda og stefnumiðaða upplýsingamiðlun bankans, bæði inn á við og út á við. Upplýsingamiðlun mun bera ábyrgð á samskiptum, almannatengslum, miðlun greininga og ytri fræðslu og styðja þannig við samræmda og skýra rödd Landsbankans í samfélagsumræðu. Á sviði Samskipta og menningar eru fyrir mannauðsmál, markaðsmál og rekstur fasteigna bankans,“ segir í tilkynningunni.
Samkvæmt henni hefur Kristín víðtæka reynslu af samskiptum á breiðum grunni.
„Hún hefur starfað á mörkum fyrirtækja og fjölmiðla og unnið náið með stjórnendum að mótun orðræðu og stefnumiðaðra samskipta. Undanfarin ár var hún markaðs- og samskiptastjóri hjá EFLU þar sem hún bar ábyrgð á innri og ytri samskiptum, leiddi teymi og sinnti stefnumótun, fjölmiðlasamskiptum og ritstjórnarlegri ábyrgð á ársskýrslu. Kristín hefur jafnframt starfað sem sjálfstætt starfandi ráðgjafi á sviði samskipta, ímyndarmála og opinberrar umræðu, auk þess að vera meðstjórnandi hlaðvarpsins Komið gott og álitsgjafi í fjölmiðlum.“
Undir deildina falla samskiptateymi og Greiningadeild bankans. Una Jónsdóttir, aðalhagfræðingur Landsbankans, mun áfram leiða greiningarteymið innan nýrrar deildar.
