Magnús Sigurbjörnsson, bróðir Áslaugar Örnu þingmanns, hefur ákveðið að byrja með hlaðvarp sem fjallar um stjórnmál og kosningabaráttu.

Hlaðvarpið nefnist Korter í kosningar og er Pétur Krogh Ólafsson, þróunar- og viðskiptastjóri Veitna, með Magnúsi í hlaðvarpinu. Þeir hafa báðir tekið þátt í stjórnmálum, Pétur fyrir Samfylkinguna og Magnús fyrir Sjálfstæðisflokkinn.

„Við ætlum að prófa að stíga það skref að tala aðeins meira um kosningarnar. Ég var fyrrverandi starfsmaður borgarstjórnarhóps Sjálfstæðisflokksins og hann var fyrrverandi aðstoðarmaður Dags B. Eggertssonar þegar hann var borgarstjóri fyrir Samfylkinguna. Við kynntumst þar og ætlum að byrja á því að tala við skemmtilegt fólk og reyna að kafa ofan í kosningarnar,“ sagði Magnús við Morgunblaðið.

Lítið hefur borið á systur Magnúsar síðan hún fór í námsleyfi frá Alþingi í fyrra en stuttu fyrir það grunuðu margir hana um að hafa verið drukkin í ræðustól Alþingis.