Breska leikkonan Emma Watson, sem er þekktust fyrir leik sinn í Harry Potter-myndunum, virðist hafa fundið sér nýjan lífsförunaut ef marka má nýlegar ljósmyndir sem teknar voru í Mexíkóborg. Þar sést Watson í nánum samskiptum við mexíkóska fjárfestinn Gonzalo Hevia Baillères, og hafa myndirnar vakið mikla athygli í erlendum fjölmiðlum.

Á myndunum sjást Watson og Baillères kyssast á flugvelli í borginni áður en hún fer um borð í flugvél. Þau virðast einnig hafa eytt tíma saman yfir máltíð, sem hefur ýtt undir vangaveltur um að þau séu par.

Baillères kemur úr einni auðugustu fjölskyldu Mexíkó. Fjölskylda hans hefur byggt upp milljarða dollara auð meðal annars með starfsemi í námuvinnslu og rekstri lúxusvöruverslana. Sjálfur hefur hann stofnað fjárfestingarfyrirtæki og starfar á sviði viðskipta og fjárfestinga.

Samkvæmt erlendum miðlum hefur Baillères áður verið orðaður við latnesku poppsöngkonuna Belindu.

Hvorki Watson né Baillères hafa þó staðfest opinberlega að þau séu í sambandi. Þrátt fyrir það hafa nýju myndirnar aukið orðróminn um að nýtt frægt par sé mögulega komið fram á sjónarsviðið.