Trung Van Ngo hefur verið dæmdur í þriggja mánaða fangelsi af Héraðsdómi Reykjavíkur fyrir brot gegn kynferðislegri friðhelgi og brot gegn barnaverndarlögum.

Ngo var ákærður fyrir að hafa mánudaginn 9. október 2023, í búningsklefa í Reykjavík, án samþykkis tekið upp myndband á farsíma sinn af tveimur börnum. Á myndbandinu sást í rass þeirra og kynfæri og þannig framleitt myndefni sem sýndi börn á kynferðislegan hátt.

Með háttsemi sinni sýndi ákærði börnunum jafnframt yfirgang, ósiðlegt athæfi og vanvirðandi framkomu að sögn dómsins.

Ngo játaði brot sitt og lýsti iðrun en myndbandið var sex sekúndur að lengd. Líklegt verður að teljast að brotið hafi átt sér stað í Laugarnesskóla en starfsmaður skólans var handtekinn í október sama ár og var upplýst að málið væri rannsakað sem kynferðisbrot.

Dómur Ngo er skilorðsbundinn til tveggja ára og þarf hann að greiða málsvarnarþóknun skipaðs verjanda síns, Ólafs Freys Frímannssonar lögmanns, 435.240 krónur, og þóknun réttargæslumanns brotaþola, Ingu Lillýjar Brynjólfsdóttur lögmanns, 485.460 krónur.