Börkur Hrólfsson, stjórnandi Facebook-hóps um ferðaþjónustu á Íslandi, vandar eigendum Kersins ekki kveðjurnar í færslu sem hann skrifaði á samfélagsmiðla fyrr í dag.

Segir hann skorta metnað til að reka staðinn og birtir hann einnig mynd af litlum miða sem tilkynnir gestum að klósett staðarins séu í ólagi. Þá segir hann einnig að ekki sé hægt að versla sér veitingar eftir hálf fimm á daginn.

Taka margir undir orð Barkar í athugasemdakerfinu og saka eigendur Kersins um græði og peningaplokk en Kerið er einn vinsælasti viðkomustaður ferðamanna á Íslandi. Kostar 700 krónur að fá aðgang að svæðinu.

Artic Adventures er núverandi eigandi Kersins en fyrirtækið keypti það af Óskari Magnússyni, Ásgeiri Bolla Kristinssyni, Sigurði Gísla Pálmasyni og Jóni Pálmasyni árið 2023.

„Kerið er með merkilegustu náttúruperlum landsins. Við teljum að góðir möguleikar séu til staðar til frekari uppbyggingar við svæðið og jafnframt áframhaldandi náttúruverndar. Kerið er  í alfaraleið og aðgengilegt til lengri eða skemmri skoðunarferða. Við fögnum því að hafa náð samningum um þessi kaup og hyggjumst vanda þar til uppbyggingar. Arctic Adventures á allt undir þegar kemur að náttúruvernd og því skiptir góð umgengni um náttúruna okkur gríðarlega miklu máli,“ sagði Ásgeir Baldurs, forstjóri Arctic Adventures, þegar fyrirtækið keypti Kerið.