Ferðamaður var kýldur í andlitið um fjögurleytið í dag, þar sem hann stóð við rútubiðstöð á Snorrabraut. Gerandi gekk því næst inn í hús við götuna.

Starfsmaður ferðaþjónustu sagði frá því í Facebook-hópnum Bakland ferðaþjónustunnar, að karlmaður hafi gengið að ferðamanni við „bus stop 9“ á Snorrabraut og kýlt hann í andlitið. Við færsluna birti hann ljósmyndir sem sýnir blóðugar hendur ferðamannsins og ljósmynd af meintum geranda við útidyr á Snorrabraut.

„Þessi drullumörður gekk upp að ferðamanni á bus stop 9 og kýldi hann í andlitið að ástæðulausu,“ skrifaði ferðaþjónustuaðilinn og bætti við að meintur gerandi hafi síðan gengið inn í hús við Snorrabraut og spurði hvort einhver vissi hvort einhver vissi „eitthvað um þennan skúrk“.

Mannlíf heyrði í Ásmundi Rúnari Gylfasyni, stöðvarstjóra á lögreglustöðinni við Hlemm, sem er steinsnar frá vettvangi árásarinnar. Sagði hann blaðamanni að ekki væri búið að færa málið inn í kerfið en útilokaði ekkert, það sé svo stutt síðan árásin varð.

Í uppfærslu á færslu ferðaþjónustuaðilans kemur fram að ferðalangurinn sé kominn upp í flugvél en að lögreglan hafi verið látin vita af málinu.