Rapparinn Bhad Bhabie, 21 árs, deildi heilsufréttum með aðdáendum sínum í gær, sem ollu áhyggjum, en hún gaf í skyn að barátta hennar við blóðkrabbamein væri langt frá því að vera yfirstaðin.

Hún birti færslu á X þar sem hún skrifaði: „Slæmar fréttir frá lækninum mínum í gær, Guð á síðasta orðið, ekki krabbameinið mitt.“ Ummælin vöktu mikla athygli og áhyggjur meðal fylgjenda hennar.

Bhad Bhabie, sem fyrst vakti athygli þegar hún reifst við Dr. Phil í þætti hans þegar hún var 13 ára, greindi fyrst frá krabbameinsgreiningu sinni í nóvember 2024 eftir að aðdáendur tóku eftir verulegu þyngdartapi. Hún sagði þá að „krabbameinslyf“ væru ástæðan fyrir breytingunum á líkamsþyngd. Síðar staðfesti heimildarmaður fjölskyldunnar við TMZ að hún væri í meðferð hjá lækni vegna krabbameins.

Ekki var fyrr en í janúar 2025 sem hún upplýsti nánar um veikindin og sagði þá að hvít blóðkorn hennar væru óeðlilega mörg, sem geti bent til ákveðinna tegunda blóðkrabbameins eða sjúkdóma í beinmerg.

Þrátt fyrir alvarlega greiningu lét Bhad Bhabie veikindin ekki stöðva sig í daglegu lífi. Með samþykki læknis fór hún meðal annars í nefaðgerð á síðasta ári. Sú ákvörðun vakti gagnrýni meðal sumra aðdáenda, en hún lét það ekki á sig fá. „Þetta er andlitið mitt. Mér líkaði það ekki og ég lagaði það,“ svaraði hún og bætti við að þeir sem hefðu áhyggjur af útliti hennar væru „brjálaðir“.

Hún hélt einnig áfram tónlistarferlinum og gaf út svokallað diss-lag þar sem hún réðst að Alabama Barker, dóttur Travis Barker. Átökin milli þeirra blossuðu upp snemma árs 2025, þar sem þær skiptust á skotum í gegnum tónlist og samfélagsmiðla.

Bhad Bhabie gekk jafnvel svo langt að skora Alabama Barker á hólm í slagsmál, en ekkert bendir til þess að átök hafi raunverulega átt sér stað.