Glæsileg og afar vel staðsett eign við Sævang 25 í Hafnarfirði er komin á sölu.

Um er að ræða 347,9 fermetra sjónsteypuhús með áli á þaki og þakköntum og gluggum úr Oregon Pine. Eigninni hefur verið einstaklega vel við haldið og ber þess skýr merki í allri umhirðu og frágangi.

Staðsetning hússins er með því einstæðara sem gerist á höfuðborgarsvæðinu. Það situr bókstaflega á þröskuldi náttúrunnar, umlukið klettaborgum á þrjá vegu, hrauni og mosagróðri. Þrátt fyrir þessa miklu nálægð við ósnortið umhverfi er steinsnar í alla helstu þjónustu, skóla og íþróttasvæði.

Húsið stendur í rólegum botnlanga ásamt sex öðrum húsum. Þaðan er örstutt í leikskóla, barnaskóla og grunnskóla, útivistarsvæðið við Víðistaðatún, Sundhöll Hafnarfjarðar og skátaheimilið. Innan við fimmtán mínútna rölt er niður í miðbæ Hafnarfjarðar þar sem verslun og þjónusta er fjölbreytt.

Lóðin er skjólsæl og sólrík og má með sanni segja að hún sé ævintýraleg á alla mælikvarða. Afstaða hússins tryggir gríðarlegt skjól á suðvesturhlið þess, þar sem útivistarsvæði nýtur mikils næði í faðmi náttúrunnar. Umhverfið er „prívat“ og friðsælt, og útsýni og landslag hreint konfekt fyrir augun.

Innra skipulag hússins einkennist af mikilli lofthæð og sérsmíðuðum viðarinnréttingum sem gefa rýmunum hlýlegt og vandað yfirbragð. Í húsinu eru fimm svefnherbergi auk rúmgóðrar stofu og borðstofu. Þá má finna sjónvarpsstofu, koníaksstofu, bíósal og líkamsræktaraðstöðu, svo fátt eitt sé nefnt.

Húsið kostar 220.000.000 milljónir króna.