Fimm ára drengur lést eftir að hafa andað að sér helíum úr blöðru, og fjölskylda hans varar nú foreldra við hættunni sem fylgir slíkum vörum.

Karlton Noah Donaghey var aðeins í burtu frá móður sinni í nokkrar mínútur þegar slysið varð á heimili fjölskyldunnar 23. júní 2022. Það dugði þó til að hann næði í helíumblöðru með banvænum afleiðingum.

Eldri systir hans, Kaitlin, hefur nú stigið fram og segir að jafnvel einn sog úr helíumblöðru geti verið lífshættulegt, þar sem gasið ryður súrefni úr lungunum og sviptir lífsnauðsynleg líffæri súrefni.

Dagurinn hafði annars verið venjulegur og ánægjulegur. Fjölskyldan naut sólríks sumardags í garðinum, þar sem Karlton lék sér meðal annars í lítilli sundlaug. Þegar hann kom upp úr vatninu bað hann um knús, en móðir hans og systir voru uppteknar við að gefa tvíburabörnum að borða.

Karlton fór þá inn á baðherbergi, og það var í síðasta sinn sem fjölskyldan heyrði hann tala.

Þegar hann hafði verið óvenju lengi inni fór móðir hans að athuga með hann. Þar blasti við hræðileg sjón. „Þegar ég kom inn var mamma með hann í fanginu, líflausan. Hann var þegar dáinn,“ segir Kaitlin í samtali við Mirror.

Drengurinn fannst liggjandi á gólfinu með helíumblöðru yfir andlitinu. Móðir hans hafði reynt að gera blöðruna öruggari með því að klippa snúruna af, en vissi ekki af hættunni sem helíum getur valdið.

Kaitlin hóf endurlífgun og kallaði á sjúkrabíl, en þrátt fyrir viðbrögð nágranna og sjúkraflutningamanna var ástand Karltons mjög alvarlegt. Hann var fluttur á sjúkrahús þar sem hann barðist fyrir lífi sínu í sex daga.

Að lokum urðu læknar að tilkynna fjölskyldunni að heilaskaðinn væri óafturkræfur og ekkert væri hægt að gera. Fjölskyldan tók þá þá erfiðu ákvörðun að slökkva á tækjum sem héldu honum á lífi.

Kaitlin segir missinn enn óbærilegan og að fjölskyldan berjist enn við sorgina. Hún vill þó að saga bróður síns verði öðrum viðvörun.

„Þetta er of mikil áhætta. Þú ert að leika þér að lífi og dauða,“ segir hún og bætir við að margir geri sér ekki grein fyrir hversu hættulegt það er að anda að sér helíumi.

Hún segist hafa heyrt um fleiri tilvik þar sem börn hafa látist af sömu ástæðu og vill að foreldrar verði meðvitaðir um hættuna áður en það er of seint.