Lögmaður mannsins sem kærði tónlistarmanninn Stefán Jakobsson fyrir líkamsárás segir óásættanlegt að vegið sé að persónu umbjóðanda síns í gegnum samfélagsmiðla og fjölmiðla. Frá því segir Vísir. Stefán var sýknaður í málinu fyrr í vikunni og tilkynnti í kjölfarið á Facebook að hann hygðist hætta sem söngvari hljómsveitarinnar Dimmu, í langri færslu sem vakti gríðarlega athygli.
Sævar Þór Jónsson, lögmaður mannsins, sendi frá sér yfirlýsingu þar sem hann undirstrikar að „lögvarinn réttur hvers manns að tjá sig um niðurstöðu dómsmála“ sé ótvíræður. Hann telur þó að Stefán, sem gengur undir nafninu Stebbi Jak, hafi farið yfir strikið í Facebook-færslunni sem hann birti í gær.
Í yfirlýsingunni segir að þar sé „vegið að æru umbjóðanda míns, hann titlaður „gerandi“ og fjallað um persónulega heilsufarssögu hans og viðkvæm einkamálefni á opinberum vettvangi“.
Sævar gagnrýnir sérstaklega það sem hann kallar atlögu að friðhelgi einkalífs, þar sem upplýsingar úr sjúkraskrám og öðrum viðkvæmum gögnum séu dregnar fram opinberlega. Slík umfjöllun eigi ekki heima í opinberri umræðu og geti valdið frekara tjóni. Að hans mati gefi hún jafnframt „ranga og einhliða mynd af málavöxtum“.
Í yfirlýsingu sinni rakti Stebbi Jak atburðarás málsins sem staðið hefur yfir í tvö og hálft ár. Færslan bar yfirskriftina „Hættur í Dimmu“, en þar tilkynnti hann jafnframt brotthvarf sitt úr hljómsveitinni. Sagði hann ástæðu þess meðal annars vera ágreining við bassaleikarann Silla Geirdal og eiginkonu hans, sem hann telur hafa tekið afstöðu gegn sér vegna tengsla við kærandann.
Í færslunni segir Stebbi meðal annars: „Í gær lauk tveggja og hálfs árs óvissutíma með skýrum sýknudómi vegna ákæru um líkamsárás. Ég hafði alltaf trú á að þetta færi vel, en léttirinn að fá þetta staðfest er ólýsanlegur.“ Hann kveðst jafnframt munu vísa til mannsins sem áður var nefndur „brotaþoli“ sem „geranda“.
Í yfirlýsingu lögmannsins er jafnframt bent á að dómur héraðsdóms sé ekki endanleg niðurstaða þar sem áfrýjunarfrestur sé enn í gildi. Ríkissaksóknari hefur fjórar vikur til að áfrýja niðurstöðu málsins.
Að lokum segir í yfirlýsingunni að umbjóðandi hans muni ekki bregðast við einstökum ásökunum opinberlega, þar sem slíkur málflutningur „dæmi sig sjálfur“.
Hér fyrir neðan má sjá yfirlýsingu Sævars í heild sinni:
Yfirlýsing vegna opinberrar umfjöllunar Stefáns Jakobssonar
Undirritaður lögmaður sendir frá sér eftirfarandi athugasemd fyrir hönd umbjóðanda míns vegna yfirlýsingar sem Stefán Jakobsson birti á samfélagsmiðlum og í fjölmiðlum.
Það er lögvarinn réttur hvers manns að tjá sig um niðurstöðu dómsmála, en það er hins vegar með öllu óásættanlegt að nýta slíkan vettvang til að vega að persónu umbjóðanda míns með þeim hætti sem gert er. Í yfirlýsingunni er vegið að æru umbjóðanda míns, hann titlaður „gerandi“ og fjallað um persónulega heilsufarssögu hans og viðkvæm einkamálefni á opinberum vettvangi.
Sérstaklega er mótmælt þeirri atlögu að friðhelgi einkalífs umbjóðanda míns sem felst í því að draga fram upplýsingar úr sjúkraskrám og persónulegum högum til að sverta ímynd hans. Slík umfjöllun á ekkert erindi í opinbera umræðu, er til þess fallin að valda frekari skaða og dregur upp ranga og einhliða mynd af málavöxtum.
Rétt er að árétta að niðurstaða héraðsdóms er ekki endanleg þar sem áfrýjunarfrestur er enn yfirstandandi. Að öðru leyti mun umbjóðandi minn ekki svara einstökum ásökunum eða fullyrðingum Stefáns á opinberum vettvangi, enda er það mat okkar að slíkur málflutningur dæmi sig sjálfur.
Lögð er rík áhersla á að fjölmiðlar sýni ábyrgð og gæti þess að gerast ekki málpípa fyrir ómálefnalegar dylgjur og opinbera útlistun á viðkvæmum persónuupplýsingum.
Fyrir hönd umbjóðanda míns.
Virðingarfyllst,
Sævar Þór Jónsson hrl.
