Fimm manna starfshópur vinnur nú að skýrslu sem leggja á fyrir bæjarstjórn Akureyrar þar sem þess er farið á leit að vannýttu svæði við Mýrarveg verði breytt í lifandi samfélagsgarð. Hugmyndin snýst um að efla lýðheilsu, vinna gegn félagslegri einangrun og skapa grænan samverustað fyrir íbúa á öllum aldri.

Það er Eyrún Gígja Káradóttir, sérfræðingur hjá Umhverfis- og orkustofnun, sem varpar hugmyndinni fram í grein sem birtist á akureyri.net. Auk Eyrúnar skipa starfshópinn þau Heiðrún Sigurðardóttir, forstöðumaður Matjurtagarða Akureyrar, Valur Þór Hilmarsson, forstöðumaður Lystigarðsins, og Fjóla Sigurðardóttir og Margrét Alfreðsdóttir fyrir hönd stjórnar Félags eldri borgara á Akureyri (EBAK).

Úr snjógeymslu í grænan þráð hverfisins

Horft er til svæðis við norðurenda Mýrarvegar, nánar til tekið sunnan við blokkirnar númer 111–117. Svæðið er í dag nýtt sem snjógeymsla á veturna en undir möl og byggingarefni á sumrin, og mýrlent svæðið er oft blautt og subbulegt langt fram á sumar.

Hópurinn sér mikla möguleika í að breyta þessu svæði í hjarta græns þráðar sem tengi saman Klettaborgarhverfi, Mýrarhverfi og Gerðahverfi. Hugmyndirnar fela meðal annars í sér:

• Upphækkuð ræktunarbeð og lítil gróðurhús sem henta fólki á öllum aldri.
• Samverusvæði með bekkjum, borðum, útiskák, pétanque-velli og einföldum líkamsræktartækjum.
• Betri göngu- og hjólastíga sem liðast á milli trjánna á nærliggjandi grónum svæðum, auk útsýnisstaðar á klöppunum með útsýni yfir Eyjafjörð.

„Ræktum ekki aðeins grænmeti, við ræktum samfélag“

Ræktunarmöguleikar eru þegar til staðar á Akureyri hjá Gömlu gróðrarstöðinni, en Eyrún leggur áherslu á að samfélagsgarður snúist fyrst og fremst um fólkið og nærumhverfið. Garðurinn eigi að vera staður þar sem engin krafa er gerð, þar sem nágrannar hittast, nýir íbúar kynnast hverfinu og eldri borgarar miðla þekkingu til yngri kynslóða. „Þannig ræktum við ekki aðeins grænmeti, við ræktum samfélag,“ skrifar Eyrún.

Áskorun um að byrja smátt

Hópurinn skorar á nýjan meirihluta hjá Akureyrarbæ að dusta rykið af eldri tillögum og gefa verkefninu tækifæri með því að byrja smátt. Lagt er til að ráðast ekki í dýrar heildarframkvæmdir strax, heldur setja upp nokkur ræktunarbeð og bekki og prófa verkefnið sem tilraun í tvö til þrjú sumur til að meta áhugann.

Að lokum hvetur starfshópurinn áhugasama bæjarbúa sem vilja taka þátt í mótun skýrslunnar og verkefnisins til að setja sig í samband við einhvern úr hópnum.