Tónlistarkonan Una Stefánsdóttir eða Una Stef eins og hún kallar sig, segist hafa hafnað tilboði frá erlendu fyrirtæki sem vildi fá hana til að taka upp hundruð klukkustunda af tali og söng á íslensku til að þjálfa gervigreindarkerfi.

Una greinir frá þessu í færslu á samfélagsmiðlum þar sem hún segir fyrirtækið hafa haft ítrekað samband við sig.

„Það er erlent fyrirtæki búið að hafa ítrekað samband við mig til þess að fá mig til að vinna fyrir sig. Ég á að taka upp hundruði klukkutíma af sjálfri mér að tala íslensku og sömuleiðis á ég að syngja enn fleiri klukkutíma af efni á íslensku,“ skrifar hún.

Markmiðið hafi verið að þjálfa gervigreind til að tala og syngja á íslensku og mögulega nota rödd hennar í framtíðinni.

„Jú, þeir vilja þjálfa AI módelið sitt til þess að læra íslensku og að öllum líkindum kaupa svo réttinn á að nota röddina mína í vöruna sína. Ég gæti orðið næsta Siri! Nema alíslensk OG syngjandi!“

Að hennar sögn var henni boðið mjög há greiðsla fyrir verkefnið en hún segist ekki hafa þurft að hugsa sig lengi.

„Fyrir þetta er mér boðið heeeeeellingur af peningum en ég þurfti ekki að hugsa mig tvisvar um. Svarið er nei.“

Una segir að hún vilji ekki að rödd hennar verði notuð á opinberum vettvangi þar sem hún hafi enga stjórn á því í hvaða samhengi hún birtist.

„Ég vil ekki selja röddina mína á opinberan vettvang þar sem hver sem er getur notað hana í hvað sem er,“ skrifar hún og bendir á að röddin gæti jafnvel verið notuð í auglýsingar eða efni sem hún vilji ekki tengjast.

Hún segir söngrödd sína vera afrakstur margra ára vinnu og reynslu og vill ekki að gervigreind læri að endurgera hana.

„Ég er búin að eyða mörgum árum, peningum, tíma í námi, á sviði og í hljóðveri til þess að æfa söngröddina mína og verða að söngkonunni sem ég er í dag.“

Í færslunni hvetur hún aðra listamenn til að íhuga vel áður en þeir samþykkja sambærileg tilboð og spyr: „Hvers virði er röddin ykkar?“

Una segir jafnframt að hún hafi áhyggjur af áhrifum gervigreindar á tónlistariðnaðinn og kallar eftir skýrari reglum.

„Það vantar skýrari lagaramma í kringum hvað má og hvað má ekki,“ skrifar hún og segir að nú þegar sé gervigreind notuð til að búa til tónlist fyrir auglýsingar, sjónvarp og streymisveitur.

Hún segir þó að hún sé ekki andvíg gervigreind í sjálfu sér.

„Að því sögðu þá er ég enginn AI hater,“ skrifar hún og segir tæknina geta verið gagnlega, svo lengi sem hún vinni með listafólki en taki ekki vinnuna af því.