Gunnar Smári Egilsson, ritstjóri Samstöðin, hefur aftur verið lagður inn á hjartadeild eftir bakslag í lyfjameðferð. Þetta kemur fram í færslu sem hann birti á Facebook.

Gunnar Smári var lagður inn á sjúkrahús í febrúar vegna blóðtappa, en segir nú að ekki sé um alvarlegt ástand að ræða að þessu sinni:

„Þá er maður aftur kominn á hjartadeildina, ekkert alvarlegt, bara eitthvert bakslag í lyfjameðferðinni, líkaminn ekki sáttur.“

Vegna þessa mun hann ekki sinna þáttagerð á næstunni:

„Það er því útséð um að ég verði með viðtöl á Samstöðinni fyrir páska.“

Hann bendir jafnframt á að álagið á litla ritstjórn miðilsins sé mikið, sérstaklega þar sem fleiri starfsmenn hafa einnig glímt við veikindi:

„Það er mikið á þann litla vinnustað lagt, ég lagðist í sama rúmið og María Lilja hafði útskrifast úr fyrir helgi. Saman höfum við meira og minna haldið einu rúmi á hjartadeildinni síðan fyrir jól.“

Að lokum hvetur Gunnar Smári fólk til að styðja við samstarfsfólk hans:

„Það er því mikið álag á þeim sem eftir eru uppistandandi af starfsfólki Samstöðvarinnar, ég bið ykkur um að biðja fyrir því góða fólki. Og kannski að gerast áskrifendur, til að hjálpa okkur yfir þennan hjall.“