Hanna Katrín Friðriksson atvinnuvegaráðherra hefur ákveðið að veita Samkeppniseftirlitinu 30 millj. kr. viðbótarframlag til að vinna að áherslum stjórnar um virka samkeppni á dagvörumörkuðum en greint er frá þessu í tilkynningu stjórnvalda.

„Það er mikilvægt að Samkeppniseftirlitið hafi bolmagn til að fylgja eftir áherslum stjórnar eftirlitsins. Í þeim áherslum er sérstaklega fjallað um mikilvægi samkeppni á dagvörumörkuðum, m.a. flutningamarkaði og eldsneytismarkaði. Er þetta mikilvægur liður í aðgerðum stjórnvalda til að ná niður verðbólgu og til að efla virka samkeppni og neytendavernd,“ segir Hanna Katrín Friðriksson, atvinnuvegaráðherra.

Þessi ráðstöfun er að sögn stjórnvalda hluti af almennri viðleitni stjórnvalda til að ná niður verðbólgu og samræmist áherslum í stefnuyfirlýsingu ríkisstjórnarinnar um mikilvægi virkrar samkeppni og öfluga neytendavernd.