Bandaríska rapparanum Nicki Minaj hefur verið stefnt fyrir dóm, samkvæmt heimildum TMZ, vegna meintrar vangreiðslu til framleiðslufyrirtækis sem segist hafa lagt út yfir 275 þúsund bandaríkjadali, sem er rúmar 34 milljónar króna, vegna tónleikahalds og tengdrar þjónustu.

Samkvæmt dómsgögnum hefur fyrirtækið 24/7 Productions höfðað mál gegn Minaj og framleiðslufyrirtæki hennar, Pink Friday Productions. Fyrirtækið kveðst fyrst hafa unnið með listakonunni árið 2022 við tónleika.

Í lok árs 2023 segir fyrirtækið Minaj hafa leitað til þeirra á ný vegna tónleika hennar á Jingle Ball-hátíðinni og útgáfuhófs fyrir plötuna Pink Friday 2. Samkvæmt stefnu málsins lagði 24/7 Productions fram fjárhagsáætlanir sem voru samþykktar af teymi Minaj, og veitti þjónustu, þar á meðal skipulagningu, vettvangsstjórnun, mönnun, hljóð- og ljósabúnað, sviðsuppsetningu, flutninga og heildarumsjón.

Fyrirtækið heldur því fram að það hafi lagt út meira en 275 þúsund dali fyrir framleiðslukostnaði sem átti að endurgreiðast. Þá er því haldið fram að fyrirtæki Minaj hafi fengið um 650 þúsund dali greidda fyrir Jingle Ball-tónleikana eina saman, án þess að skuldin við 24/7 Productions hafi verið gerð upp.

Samkvæmt stefnunni hefur fyrirtækið ítrekað reynt að innheimta upphæðina á undanförnum árum, en fengið óljós svör frá teymi Minaj, meðal annars að málið yrði „skoðað nánar“.

24/7 Productions fer fram á skaðabætur vegna meints samningsbrots og krefst greiðslu sem nemur að minnsta kosti 275 þúsund bandaríkjadölum.

Rappkonan hefur ekki tjáð sig um stefnuna að svo stöddu.