Inga Sæland, félags- og húsnæðismálaráðherra, heimsótti á dögunum Kvennaathvarfið og kynnti sér starfsemina.

Kvennaathvarfið hefur starfað síðan um 1980 og er ætlað að veita öruggt skjól fyrir konur og börn sem þurfa að flýja heimilisofbeldi. „Kvennaathvarfið er lífsnauðsynlegt skjól. Þar fá konur og börn ekki aðeins vernd, heldur einnig von og stuðning við að byggja upp nýtt líf,“ segir Inga Sæland við tilefnið.

Linda Dröfn Gunnarsdóttir, framkvæmdastýra Kvennaathvarfsins, tók á móti ráðherra og kynnti bæði húsnæðið og þjónustuna sem þar fer fram. Inga hitti jafnframt ráðgjafa og fékk innsýn í dagleg störf þeirra.

Sérstök áhersla er lögð á að skapa notalegt og heimilislegt andrúmsloft í Kvennaathvarfinu og sjá til þess að íbúar geti haldið áfram með daglegt líf sitt. Flestar konur sem þar dvelja halda áfram að sækja vinnu og börnin fara oftast í sína leik- og grunnskóla en á næsta ári mun starfsemin í Reykjavík flytjast í nýtt og stærra húsnæði.