Klara Baldursdóttir, sem margir þekktu sem Klöru á Klörubar, er látin, 74 ára að aldri. Hún lætur eftir sig tvo syni, Eirík og Jordans. Vísir sagði frá andlátinu.

Klara fæddist 22. janúar 1951 og var næstyngst fimm systkina. Foreldrar hennar voru Baldur Jónsson kaupmaður og Hansína Helgadóttir. Klara ólst upp á höfuðborgarsvæðinu, en dvaldi einnig um tíma á Spáni sem barn.

Árið 1969 flutti Klara til Spánar og aftur árið eftir, í lengri dvöl. Þar hitti hún síðar eiginmann sinn, Francisco Casadeus, árið 1971. Þau settust að á Kanaríeyjum og stofnuðu saman barinn Cosmos, sem á meðal Íslendinga var alltaf kallaður Klörubar. Þau eignuðust tvo syni og lifðu þar saman til ársins 2021, þegar Francisco lést.

Í viðtali við Rakel Sveinsdóttur árið 2024 sagði Klara frá lífi sínu og tengslum við íslenskt samfélag á Kanarí. Hún var víða álitin óformlegur fulltrúi Íslendinga á svæðinu og var sæmd aðild að Íslendingafélaginu á Kanarí sem heiðursfélagi.

Fréttir af andláti Klöru bárust fyrst frá Jordi Hans, sem birti minningarorð í Facebook-hópnum Kanaríflakkarar:

„Með djúpri sorg tilkynnum við að elskuleg vinkona okkar og dásamleg kona, Klara Baldursdóttir, er fallin frá,“ skrifaði hann.

Minningarstund varhaldin á Kanaríeyjum í gær til heiðurs Klöru.

Meðlimir Facebook-hópsins Kanaríflakkarar hafa verið að minnast Klöru í athugasemdum en Ingólfur nokkur segir meðal annars:

„Kæru bræður Jordi og Eirikur. Við Hanna vottum ykkur okkar innilegustu samúð vegna fráfalls móður ykkar hinni elskulegu Klöru. Við söknum hennar og svo mun verða hjá þúsundum Íslendinga sem hafa kynnst henni á mörgum áratugum. Hún var hjálpsöm við Íslendinga og leysti öll vandamál sem upp komu fyrr og síðar.“

Margrét nokkur skrifaði: „Elsku Klara okkar farin, það er svo ótrúlegt og erfitt að hugsa sér lífið án hennar. Ekki bara vegna þess hve hjálpsöm hún var öllum sem á þurftu að halda heldur var hún svo yndisleg manneskja. Blessuð sé minning hennar. Elsku Eiríkur og Jordi Hans mínar innilegustu samúðarkveðjur til ykkar.“

Þá skrifaði Hjálmfríður nokkur einnig fallega athugasemd:

„Elsku Klara hún skilur eftir sig stórt skarð. Margir sem treysta sér ekki ad vera á Canari án hennar hjálpar. Hún var yndisleg. Innnilegar samúđarkveðjur til ykkar. Blessuđ sé minning hennar.“