Kári Stefánsson, fyrrverandi forstjóri Íslenskrar erfðagreiningar, er allt annað en sáttur með skrif Morgunblaðsins um sig. Forstjórinn fyrrverandi segir að blaðið reyni að tengja sig við Jeffery Epstein en nafn Kára kemur fyrir í skjölunum um hann.

Nafn Kára Stefánssonar í Epstein-skjölunum segir í fyrirsögn Morgunblaðsins

Við leit að nafni Kára í gagnasafni dómsmálaráðuneytis Bandaríkjanna komu upp tvö skjöl. Í báðum tilvikum er um að ræða tölvupósta. Annar pósturinn er frá árinu 2009 og fjallar um erfiðleika hjá deCODE Genetics á þeim tíma, sem og mögulegar rekstrarbreytingar til að bregðast við vanda fyrirtækisins.

Hinn pósturinn er frá árinu 2010 og inniheldur yfirlýsingu frá talsmanni deCODE, sem var áframsend til Jeffrey Epstein.

Tengja við barnaníðing

„Það er engin spurning að með fyrirsögninni er Morgunblaðið að gefa í skyn að ég hafi verið í einhvers konar samskiptum við hinn látna barnaníðing,“ segir Kári um málið.

„Það er hins vegar ljóst við lestur fréttarinnar undir fyrirsögninni að blaðið vissi betur. Þar af leiðandi var blaðið vísvitandi að afvegaleiða lesendur sína. Þetta er nokkurn vegin eins slæm blaðamennska og hugsast getur. Í gær hafði ég samband við málsmetandi mann úr ristjórn Morgunblaðsins og bað hann að taka þessa fyrirsögn niður og fékk þau svör að það væri ekki í samræmi við vinnbrögð blaðsins að fjarlægja aðdróttun sem þeir vita að sé algjörlega út í hött. Ég vil leggja á það áherslu að með þessari framkomu er Morgunblaðið ekki að vega að mér vegna þess að þeir sem það vilja sjá glöggt að fyrirsögnin er út í hött. Það er hins vegar afleitt þegar lesendur sjá að blaðið hikar ekki við að afvegaleiða þá til þess að ná athygli og með því stríðala athugasemdakerfi sitt. Eða eins og segir í gamalli íslenkri hasarbók: Þeir fuglar eru vestir sem skíta í eigið hreiður.“