Yfirvöld í Arizona leita nú að Nancy Guthrie, móður fréttaþularins Savönnuh Guthrie í þættinum TODAY á NBC, en hvarfið var tilkynnt við aðstæður sem yfirvöld segja vekja verulegar áhyggjur.
Samkvæmt skrifstofu sýslulögreglustjórans í Pima-sýslu sást hin 84 ára gamla kona síðast á laugardagskvöld nálægt heimili sínu á Tucson-svæðinu. Lögreglustjóri sýslunnar, Chris Nanos sagði að hún hefði síðast sést á heimili sínu á milli klukkan 21:30 og 21:45 um kvöldið.
Fjölskyldumeðlimur hringdi í neyðarlínuna 911 um hádegisbilið á sunnudag til að tilkynna hvarf móður fréttakonunnar hjá NBC.
Á blaðamannafundi sagði lögreglustjórinn að á heimilinu hefðu fundist atriði sem væru „truflandi eða áhyggjuefni“, sem varð til þess að rannsóknarlögreglumenn sem sérhæfa sig í manndrápsmálum voru kallaðir til aðstoðar við rannsóknina. Þó að yfirvöld leggi áherslu á að málið sé að svo stöddu meðhöndlað sem leit og björgunaraðgerð, sagði lögreglustjórinn að rannsakendur útiloki ekki að um refsiverða háttsemi geti verið að ræða.
Leit stendur enn yfir og tekur bæði til loft- og landleitar, þar sem teymi fara yfir nærliggjandi svæði. Nancy er sögð vera um 165 sentímetrar á hæð, vega um 68 kíló, með brúnt hár og blá augu.
Í yfirlýsingu segir Savannah Guthrie:
„Fyrir hönd fjölskyldu okkar vil ég þakka öllum fyrir hlýjar hugsanir, bænir og stuðningskveðjur. Núna beinist öll athygli okkar að því að finna kæru móður okkar heila á húfi og koma henni öruggri heim.“
