Hildur Björnsdóttir, borgarfulltrúi Sjálfstæðisflokksins, gagnrýnir harðlega áform meirihluta borgarstjórnar Reykjavíkur um að draga fána Grænlands að húni við Ráðhús Reykjavíkur, til viðbótar við fána Palestínu og Úkraínu. Hún segir borgarstjórn vera að fara út fyrir sitt hlutverk og kallaði tillöguna „fánaborg fáránleikans“ í Facebook-færslu sem hún birti fyrir stundu.

Í færslunni bendir Hildur Björnsdóttir á að þótt samúð Íslendinga standi með Grænlendingum eigi borgarstjórn ekki að blanda sér í utanríkismál. „Vissulega er hugur okkar allra hjá vinum okkar á Grænlandi – en borgarstjórn hefur ekkert með utanríkismál að gera og ætti almennt ekki að flagga erlendum þjóðfánum við Ráðhúsið, nema við opinberar heimsóknir,“ skrifar hún.

Hildur rifjar jafnframt upp að hún hafi sjálf lagt fram tillögu fyrir átta mánuðum um að íslenski fáninn yrði dreginn að húni við Ráðhúsið alla daga ársins, án þess að hún hafi fengið afgreiðslu. „Meirihlutinn hefur ekki enn treyst sér til að afgreiða tillöguna. Það er hins vegar lítið hik í vinstrinu þegar kemur að fánaborg erlendra þjóðfána,“ segir hún.

Að hennar mati er of miklum tíma varið í táknræn mál á kostnað raunverulegra verkefna borgarinnar. Hún bendir á að borgarráð muni funda í þriðja sinn um málið á fimmtudag og gagnrýnir þá forgangsröðun. „Tímanum eytt í dygðaskreytingar meðan borgarbúar bíða lausna við þeim fjölmörgu áskorunum hversdagsins sem borgarstjórn getur leyst – samgönguvandanum, leikskólavandanum, húsnæðisvandanum,“ skrifar hún.

Í lok færslunnar kallar Hildur eftir pólitískum breytingum í borginni og segir að nú sé tímabært að skipta um kúrs. „Það er kominn tími á breytingar. Nýtt fólk með nýjar áherslur. Meirihluta sem skilur kjarnann frá hisminu – skilur verkefnið og setur íbúa Reykjavíkur í forgang.“