Lögregla sinnti fjölbreyttum verkefnum á höfuðborgarsvæðinu í nótt og í gærkvöldi. Meðal mála voru umferðaróhöpp, grunur um fíkniefnaakstur, þjófnaðir og ofbeldisatvik.

Tilkynnt var um árekstur þar sem ökumaður ók bifreið sinni á aðra bifreið og fór í kjölfarið af vettvangi. Málið er til rannsóknar. Þá var lögregla kölluð til vegna annars umferðaróhapps á gatnamótum í austurbæ Reykjavíkur þar sem ökumaður ók á þrjár bifreiðar. Sá ökumaður er grunaður um akstur undir áhrifum ávana- og fíkniefna auk áfengis og var vistaður í fangaklefa í þágu rannsóknar.

Lögregla stöðvaði einnig nokkra ökumenn sem grunaðir voru um akstur undir áhrifum fíkniefna. Þeir voru látnir lausir eftir sýnatöku.

Tilkynning barst um kannabislykt í heimahúsi og fór lögregla á vettvang til að kanna málið. Þá hafði lögregla afskipti af hópi manna sem tilkynnt var um að hefðu farið inn í bifreiðar. Tveir mannanna hlupu á brott þegar lögregla nálgaðist en einn þeirra ræddi við lögreglu á vettvangi.

Tilkynnt var um rúðubrot og náði lögregla manni skammt frá vettvangi. Hann var handtekinn og fluttur á lögreglustöð. Þá voru tveir menn staðnir að þjófnaði í verslun í hverfi borgarinnar. Þeir viðurkenndu brot sín og var vettvangsskýrsla fyllt út.

Lögregla var einnig kölluð til vegna manns í annarlegu ástandi. Þegar lögregla kom á vettvang hljóp maðurinn í átt að lögreglu og kastaði farsíma í lögreglubifreið. Hann neitaði að fylgja fyrirmælum og var yfirbugaður og vistaður í fangaklefa.

Að lokum var tilkynnt um eld í bifreið og innbrot í iðnaðarhúsnæði.