Matvælastofnun varar almenning við að tína og neyta kræklinga (bláskeljar) úr náttúrunni, sérstaklega í Hvalfirði og öðrum vinsælum stöðum við strendur landsins. Ástæðan er viðvarandi hætta á eiturþörungum sem oft spretta upp yfir sumartímann, einkum eftir sólríka mánuði eins og nú hefur verið í maí og júní.

Aðvörunin gildir ekki um ræktaðan krækling

Kræklingur sem ræktaður er hér á landi og seldur í verslunum og veitingahúsum er öruggur til neyslu. Matvælastofnun og heilbrigðiseftirlit fylgjast reglulega með magni eiturþörunga í sjó og þörungaeitri í skelkjöti á ræktunarsvæðum. Sýni eru tekin reglulega og strangt eftirlit er með sölu á slíkum skelfiski.

Óútreiknanleg hætta frá eiturþörungum

Sumar tegundir svifþörunga mynda eiturefni sem getur safnast upp í skelfiski án þess að hafa áhrif á hann sjálfan en getur valdið alvarlegum eituráhrifum hjá fólki og dýrum sem neyta hans. Þessi hætta getur komið skyndilega upp frá mars og fram á vetur, og er því mikilvægt að sýna aðgát allt tímabilið.

Nánari upplýsingar

Hægt er að fylgjast með niðurstöðum mælinga á eiturþörungum og þörungaeitri í kræklingi á vef Matvælastofnunar:
👉 Þörungaeitur í skelfiski | Matvælastofnun

Einnig er ítarefni um eiturþörunga og áhrif þeirra á vef Hafrannsóknastofnunar:
👉 Um þörungaeitranir | Hafrannsóknastofnun