Líkleg ástæða þess að háhyrningur strandaði nálægt Geldinganesi í gærkvöldi er að hann hafi farið á fjörurnar við kvenkyns háhyrning, við litla hrifningu.

Háhyrningurinn, sem er ungt karldýr, strandaði um klukkan níu í gærkvöldi á stað sem heitir Gorvík og liggur nærri Korpúlfsstöðum. Hann festist aftur í grynningum eftir að hafa losnað um fjögur í nótt.

Edda Elísabet Magnúsdóttir, hvalasérfræðingur og lektor í líffræði við Háskóla Íslands, sagði í samtali við Reykjavík síðdegis á Bylgjunni í dag að nokkrar ástæður gætu verið fyrir vegvillu háhyrningsins.

Háhyrningar Kyrrahafsmegin eru í hópum sem fylgja móður sinni alla ævi. Hér er það breytilegra. Að mati Eddu er einna líklegast að misheppnuð makaleit hafi leitt hann í strand, með þeim hætti að honum hafi verið vísað úr hópnum.

„Þar sem þetta er karldýr er ekkert ólíklegt að hann hafi verið á höttunum eftir kvendýri til að makast við. Og mögulega var honum bara ekki vel tekið.“

Karldýrin eiga það til að fara á flakk og svo finna þeir sinn hóp aftur. „Það er mjög óvanalegt að dýr sé rekið út úr hóp ef hann er hluti af honum, en það getur verið að þeir eru komnir á einhvern aldur, og kannski hentar það bara hópnum að hann finni sér einhvern annan.“

Aðrar ástæður geta komið til. Stundum sækja dauðvona háhyrningar í grynningar. „Ef þeir eru veikir lenda þeir oft í því hægt og rólega að reka upp í grynningar. Jafnvel sækja upp í grynningar ef þeir vita að þeir eru að drepast, þá er það ekkert óskaplega óvanalegt,“ sagði Edda Elísabet á Bylgjunni.

„Þegar það er mikið flóð og straumar geta þeir verulega misreiknað sig,“ segir hún.

Síðdegis í dag var orðið stórstreymt og tókst viðbragðsaðilum að hrekja háhyrninginn úr grynningunum og til hafs. Hann er nú frjáls, en hvað tekur við og hvort hann finni sinn hóp eða maka verður tíminn að leiða í ljós.