Síðustu vikur og mánuði hafa Lögreglunni á höfuðborgarsvæðinu borist margar tilkynningar um fjársvik og tilraunir til fjársvika en greint er frá þessu í tilkynningu frá lögreglunni,

Að sögn lögreglu hafa svikahrapparnir haft mikið upp úr krafsinu, en frá því í mars á þessu ári og fram í miðjan maí, eða á tveimur og hálfum mánuði, hafa óprúttnir aðilar haft um 100 milljónir króna af fólki og fyrirtækjum með þessum hætti.

„Mikið er um að svikararnir sendi tölvupósta og skilaboð til einstaklinga og fyrirtækja og þá er eitthvað um að fyrirtæki fái falsaða reikninga. Einnig berast símtöl frá símanúmerum sem líta út fyrir að vera íslensk, en geta verið frá brotamönnum og því er full ástæða til að vara við öllum slíkum gylliboðum sem þau kunna að innihalda. Munið að ef eitthvað er of gott til að vera satt, þá er það líklega ekki satt. Iðulega er haft samband við fólk og því boðin ,,aðstoð“ við kaup á rafmyntum o.fl. og fólki þá jafnframt sagt/leiðbeint að setja upp Anydesk, eða önnur forrit, í síma og/eða tölvur. Lögregla varar alveg sérstaklega við slíku enda er verið að bjóða svindlurunum inná raftækin með því að setja upp þau forrit. Sömuleiðis eru dæmi um að hringt sé aftur í fólk í þeim tilgangi að „aðstoða við endurheimt“ en þar er um að ræða framhald sama svindls og því eindregið varað við því líka.“

Lögrelgna nefnir sérstaklega aðila sem bjóða fram aðstoð sína með svokölluðu ,,screen-sharing“.

„Með þeirri aðferð kemst svikarinn yfir miklar upplýsingar og fær mögulega aðgang að tölvupósti, heimabanka o.s.frv. Af þessu getur hlotist mjög mikið tjón. Loks má nefna að borið hefur á því að verið er að nýta bágindi fólks. T.d. fjársafnanir fyrir einstaklega sem eru sagðir vera frá Gaza, en eru það ekki.“