Víglundur Þór Þorsteinsson læknir lést á Landspítalanum í Fossvogi 20. febrúar síðastliðinn, 91 árs að aldri. Mbl.is sagði frá andlátinu.
Víglundur fæddist á Brekku 24. júlí árið 1934 og ólst upp í Vestmannaeyjum. Foreldrar hans voru Ingigerður Jóhannsdóttir húsfreyja og Þorsteinn Þ. Víglundsson, skólastjóri og sparisjóðsstjóri.
Á unglings- og menntaskólaárum vann Víglundur við ýmis störf, meðal annars verkamannavinnu, síldveiðar og landbúnaðarstörf. Hann lauk landsprófi frá Gagnfræðaskólanum vorið 1950, stúdentsprófi frá Menntaskólanum á Laugarvatni árið 1954 og íþróttakennaraprófi frá Íþróttakennaraskóla Íslands árið 1955. Í kjölfarið starfaði hann sem kennari við Gagnfræðaskólann árin 1955–1956 og sinnti jafnframt þjálfun og íþróttakennslu á sumrin á árunum 1955–1958.
Víglundur lauk læknaprófi í febrúar 1964 og bandarísku útlendingaprófi í læknisfræði í mars sama ár. Á kandídatsári starfaði hann við sjúkrahús Vestmannaeyja, sem staðgengill héraðslæknis, auk starfa á sjúkrahúsum í Reykjavík. Hann hélt síðan til Bandaríkjanna til sérnáms, þar sem hann lauk bandarísku sérfræðingaprófi í læknisfræði og meistaranámi (MSc) við University of Minnesota. Hann hlaut almennt lækningaleyfi á Íslandi árið 1965 og sérfræðileyfi árið 1971.
Víglundur starfaði meðal annars við Jósefsspítala í Hafnarfirði og um tíma við Landakotsspítala. Hann rak jafnframt læknastofu í Læknastöðinni í Glæsibæ í Reykjavík og stundaði skurðlækningar kvenna í Handlæknastöðinni þar.
Hann tók virkan þátt í faglegu starfi lækna og sat í stjórn Félags íslenskra kvensjúkdómalækna á árunum 1981–1985, í stjórn Námssjóðs lækna 1981–1986 og í samninganefnd sérfræðinga innan Læknafélags Reykjavíkur 1985–1998. Víglundur var einn af stofnendum Handlæknastöðvarinnar í Glæsibæ árið 1983 og gegndi formennsku í stjórn hennar til ársins 1989. Þá var hann einnig formaður stjórnar Læknastöðvarinnar í Glæsibæ á árunum 1985–1998.
Á efri árum sinnti Víglundur meðal annars skráningu fróðleiks um Eyjar og Eyjafólk á vefnum Heimaslóð.is.
Eiginkona Víglundar var Fríða Jóhanna Daníelsdóttir, kennari og húsfreyja, sem lést árið 2023. Þau eignuðust fjögur börn: Sigrúnu, fædda 1960, Þorstein Inga, fæddan 1962, Víglund Þór, fæddan 1966, og Ásgerði Eddu, fædda 1971. Afkomendur þeirra eru sex barnabörn og sex langafabörn.
