Píratar hafa tekið upp nýtt merki sem markar nýjan kafla í ímynd og stefnu flokksins. Í fréttatilkynningu segir að merkið sé „allt í senn stílhreint, skýrt og í anda flokksins.“

Nýja aðalmerkið er dökkfjólublár fáni á fjólubláum grunni og hefur tekið breytingum frá fyrri útgáfu. „Glöggir munu taka eftir að fáninn, sem hefur verið aðalsmerki Pírata frá stofnun, hefur skerpst og harðfiskurinn vikið fyrir opnum fána sem táknar frelsi, hugrekki og áform Pírata að vera í stafni þegar kemur að málefnum framtíðarinnar, mannréttindum og samfélagsbreytingum,“ segir í tilkynningunni.

Endurmörkunin var unnin í samstarfi við auglýsingastofuna Cirkus og varð jafnframt til nýtt slagorð fyrir komandi borgarstjórnarkosningar: „Bestum borgina.“

Rósa María Árnadóttir, framkvæmdastjóri Cirkus, segir verkefnið hafa endurspeglað breytingar innan flokksins

„Samstarfið við Pírata hefur verið frábært. Frá fyrsta fundi var augljóst að flokkurinn stæði á tímamótum og að mikilvægt væri að draga fram kjarnann í því sem Píratar standa fyrir. Afraksturinn er nýtt merki, hnitmiðað slagorð og skýr samskiptastefna sem endurspeglar stemninguna og eldmóðinn í flokknum fyrir komandi borgarstjórnarkosningar.“

Samkvæmt tilkynningunni kemur breytingin í kjölfar nýs skipulags innan flokksins, þar sem Píratar kusu sinn fyrsta formann á síðasta ári. Oktavía Hrund Guðrúnar Jóns, formaður Pírata, segir nýja merkið tákna nýja tíma: „Fáninn er merki um nýja tíma hjá Pírötum. Það blása ferskir vindar um flokkinn þessa dagana og þá er gott að merki Pírata sé fáni sem blaktir við hún.“

Hún bætir við að flokkurinn sé „kraftmikill og tilbúinn í næsta kafla stjórnmálanna, óhræddur við að taka slaginn gegn upprisu fasisma í heiminum og staðráðinn í að standa vörð um mannréttindi.“