Á síðasta ársfjórðungi ársins 2024 var rafbyssum beitt af lögreglu tvisvar sinnum við handtöku en greint er frá þessu í nýrri skýrslu Ríkislögreglustjóra.

Á fyrsta ársfjórðungi hefur lögregla beitt rafbyssu við handtöku þrisvar sinnum. Í september 2024, var rafbyssa dregin úr slíðri og/eða ógnað með því fjórum sinnum. Í 13 tilvikum á síðasta ársfjórðungi ársins 2024 var rafbyssa dregin úr slíðri og/eða ógnað með því við handtöku, en það sama átti við í 28 málum fyrsta ársfjórðung þessa árs.

Rafbyssur voru teknar í notkun sem vopn hjá lögreglu í september 2024. Vopnin eru á sama stigi í valdbeitingarstiganum og kylfa og piparúði að sögn lögreglu og gefa lögreglu aukna möguleika á að velja vopn sem hæfir hverju verkefni. Með því er leitast við að auka öryggi almennings og lögreglu segir Ríkislögreglustjóri.