Eiríkur Rögnvaldsson, uppgjafaprófessor í íslenskri málfræði, gagnrýnir orðalag í nýrri þingsályktunartillögu Miðflokksins þar sem lagt er til að undirbúa lög um „bann við hylmingu andlits“.

Í færslu á samfélagsmiðlum bendir Eiríkur á að hugtakanotkunin sé röng og útskýrir að „þarna er nafnorðið „hylming“ látið samsvara sögninni „hylja“ sem er rangt – „hylming“ er lögfræðilegt íðorð, leitt af sögninni „hylma“ en ekki „hylja“, og hefur aðra merkingu samkvæmt bæði Íslenskri nútímamálsorðabók og Lögfræðiorðasafni (vísar til auðgunarbrots).“

Hann segist í fyrstu hafa talið um einföld mistök að ræða og hafi bent á að annað orð hefði átt betur við: „Í fyrstu hélt ég að hinir sjálfskipuðu verndarar íslenskunnar í Miðflokknum hefðu þarna skriplað á skötu eins og getur komið fyrir besta fólk, og skrifaði um þetta pistil þar sem ég benti á að orðið „hulning“ væri fornt orð sem hefði átt þarna við – en ekki „hylming“.“

Við nánari skoðun hafi hann þó farið að efast um að um mistök sé að ræða. Hann bendir á að meðal flutningsmanna tillögunnar séu sérfræðingar sem ættu að þekkja rétt orðalag: „Í hópi tillöguflytjenda er bæði lögfræðingur og íslenskufræðingur sem hefðu átt að vita betur og átta sig á að „hylming“ á ekki við þarna.“

Eiríkur veltir því upp hvort orðavalið kunni að vera meðvitað: „Getur verið að orðið „hylming“ sé þarna ranglega notað vitandi vits til að vekja neikvæðar kenndir hjá þingmönnum og almenningi?“

Hann tekur þó fram að hann geti ekki fullyrt um slíkt, en segir það mögulega samræmast umræðu sem hann telur vera í gangi: „Ég get auðvitað ekkert fullyrt um það, en það væri þá í anda þeirrar áróðursherferðar sem Morgunblaðið og Miðflokkurinn eru nú í gagnvart múslimum.“

Í annarri Facebook-færslu birtir Eiríkur ljósmynd frá árinu 2020 sem sýnir hann og eiginkonu hans með grímur fyrir andlitinu. Við færsluna skýtur hann á Miðflokkinn og segir: „Hér má sjá skýrt brot á væntanlegum lögum um "bann við hylmingu andlits".“