Kristinn Hrafnsson, ritstjóri WikiLeaks, fordæmir harðlega stefnu Ísraelsríkis í garð Palestínumanna í nýrri færslu á Facebook. Þar lýsir hann yfir djúpri vantrú á þá hugmynd að öfgar sem kalla eftir útrýmingu Palestínumanna séu jaðarskoðanir í Ísrael og segir þess í stað að slíkar hugmyndir séu orðnar meginstraumsviðhorf.

„Ísraelar hafa misst vitið,“ skrifar Kristinn. Hann vísar þar til nýrrar skoðanakönnunar sem gerð var á vegum Penn State-háskóla í Bandaríkjunum og sýni að 82% gyðinga í Ísrael styðji algera útrýmingu Palestínumanna á Gaza, lifandi eða dauðum. Um 47% styðji jafnframt þjóðarmorð með beinni slátrun allra íbúa svæðisins.

Kristinn bendir á að áður hafi verið auðvelt að afskrifa viðhorf sem hvetja til fjöldadrápa sem öfgafullar jaðarskoðanir, en að þær séu nú orðnar viðtekin afstaða í Ísrael. Þá gagnrýnir hann sérstaklega trúarlega réttlætingu aðgerða Ísraelshers og vísar til spurningar úr fyrrnefndri könnun þar sem þátttakendur voru spurðir hvort þeir studdu að IDF (Ísraelsher) beitti aðferðum líkum þeim sem lýst er í Biblíusögunni af Jeríkó, þar sem öllu lífi var útrýmt. Tæpur helmingur hafi svarað því játandi, að sögn Kristins.

„Ísrael er orðið að ofstækisríki sem byggir aðgerðir sínar á grunni yfirburðar- og forréttindahyggju með tilvísun og réttlætingu í kreddubækur trúarinnar – Guð hefur gefið grænt ljós á slátrun og þjóðarmorð,“ skrifar hann.

Kristinn dregur í kjölfarið upp samlíkingu við hryðjuverkasamtökin ISIS og segir Ísrael nú beita hliðstæðum aðferðum og réttlætingum. Þeir sem gagnrýni þessa samlíkingu og haldi því fram að Ísrael sé lýðræðisríki með vestræn gildi, ættu að skoða söguleg fordæmi um hvernig lýðræðisríki geti runnið inn í ofstæki og nefnir þar Þýskaland á fjórða áratug síðustu aldar.

„Þýska þjóðin breyttist samt í vitfirrta drápsvél með beinni þátttöku og yfirlýstu eða þegjandi samkomulagi. Eins er farið með Ísrael í dag,“ segir Kristinn Hrafnsson að lokum í færslunni.