Glæsilegt og rúmgott parhús við Hraunás 10 í Garðabæ hefur verið sett á sölu.

Um er að ræða eign á eftirsóttum stað innst í botnlanga með miklu útsýni, þar sem friðsæld og fallegt umhverfi setja svip sinn á heildarmyndina.

Um dýrasta parhús landsins er að ræða um þessar mundir en húsið kostar 229.000.000.

Húsið, sem var byggt árið 2001, er skráð 267,5 fermetrar að stærð og býður upp á vandaða og vel skipulagða búsetu. Innra skipulag eignarinnar samanstendur af fjórum rúmgóðum svefnherbergjum, forstofuherbergi, björtu alrými með setustofu, borðstofu og eldhúsi, auk þriggja baðherbergja. Þá er einnig sjónvarpshol, stórt þvottahús með fataherbergi og innbyggður bílskúr sem eykur þægindi í daglegu lífi.

Lóðin er fullfrágengin og hönnuð með það í huga að vera bæði glæsileg og viðhaldslítil. Þar má finna rúmgóða verönd, tyrfða flöt og fallegan trjágróður neðan við húsið sem skapar skjólgott og notalegt útivistarsvæði.

Framan við húsið eru tvö hellulögð bílastæði með hitalögnum sem tryggja greiðan aðgang allt árið um kring, auk þriggja gestastæða við hliðina.